我乃是一位經常做戶外運動嘅麻甩佬，本身並唔介意、亦非常樂意曬黑，但係黑得來要有個譜，大吉利是曬出皮膚癌就唔啱數；因此，搽防曬係指定動作。上年買咗支噴霧裝嘅防曬，一噴猶如開花灑，都唔知有冇一半分量落喺皮膚之上！加上家有小孩、小貓，驚噴錯隔籬，No Good。由此今個夏天就試呢支，澳洲製造，售一舊水多少少，巴閉在有埋驅蚊之效。結果上星期搽佢去行山，曬足三、四粒鐘，手臂都冇變燒雞翼，亦冇畀蚊叮蟲咬，似乎得喎！

講起行山、跑步，損傷一定有，最尷尬莫過於磨損胸前兩點以及大腿內側，試過跑完半馬，心口有兩攤血……所以呢，我必定喺上述磨損高危區域搽定「花士令」，不過搽咗「花士令」嘅皮膚跟衣物摩擦，會令布料形成一層洗唔甩嘅灰色污垢，淺色衫的話，好礙眼。於是，近期我就試呢支抗運動磨損皮膚嘅「專科」用品，質感上較「花士令」乾身，希望長遠唔怕整污糟晒啲衫啦。