炒得起 Wi-Fi自拍 Casio Exilim TR15
靚女Upload自拍相到社交網站，自然想畀人Like爆，其實只要加埋「自拍神器」的後天之助，留言肯定猶如洗版一樣。第四代「自拍神器」Casio Exilim TR15近日面世，開售價要近六千大元，其實一啲都唔誇張，皆因此機渴市炒得起！今代規格大升級，亦新增夢寐以求的Wi-Fi功能，可以將靚相過落手機即時Share外，更可玩遙距自拍 ，一眾「女神」們仲唔快啲撲番部？
Casio Exilim TR15
$5,980（a）
新「神器」有桃紅、白和黑色三種顏色畀你揀，估計嬌艷的桃紅色會最受女生歡迎。
招牌的21mm鏡頭影到你面尖尖，旁邊仲有一盞閃光燈和收音咪。
外框新加入快門鍵，以後自拍單手搞掂，唔使再靠另一隻手篤芒或者Set Timer。
新機採用小巧的microSD記憶卡，唔再係以往用開的SD記憶卡。
改用了可替換的電池設計，大約可拍攝260張相片。
用上3吋92.1萬像素的觸控屏幕，電容式設計的反應靈敏，最適合用創意繪圖功能畫公仔。
新加入的Wi-Fi功能可以用智能裝置遙控拍攝，Set定部相機就可以玩唔望鏡頭的不經意自拍。
濾鏡特效有成十款咁多，唔玩自拍改玩Snap都一樣咁出色。
創意繪圖功能可以在相片上加花花、星星等圖案，仲可以寫字。
Wi-Fi功能除了用作遙控拍攝，亦能夠將相機內的相片過落智能裝置，單張或一大批都冇問題。
試相
使用12級美顏和美白模式，模特兒的肌膚又白又滑，而且效果相當自然，再配合創意繪圖DIY張相，即時變得繽紛和有趣。
在智能裝置下載《EXILIM Remote》App，透過Wi-Fi可預覽拍攝畫面，並支援iOS及Android系統。
Samsung MV900F $2,490（b）
Panasonic Lumix GF6 $6,890（c）（連14~42mm X鏡頭）
無線自拍兼傳相
每次「自拍神器」推出，都會因為太受歡迎而旋即熱炒，今次TR15更首次加入Wi-Fi功能，並兼容iOS及Android系統，相信會再次掀起熱潮。TR15的Wi-Fi功能可透過智能裝置作遙距拍攝，做到Zoom In、Zoom Out、影相和拍片等基本操作，就算唔望住鏡頭都影到靚靚自拍照，只要姊妹們需預先下載《EXILIM Remote》App，將兩者連繫即可使用。除了遙控自拍之外，Wi-Fi功能亦能夠將相機內的相片過落智能裝置，甚至可以大批處理，唔使逐張過咁麻煩。如果覺得原相1,210萬像素太大，無線過相預設了300萬像素，可以慳番好多時間。
12級美白變韓星
好多女士為了美白肌膚，都會出盡法寶免受太陽照射，甚至不計金錢購入大量美白產品。如果你手上擁有「神器」，就可以節省以上種種工序。TR15不但內置猶如神技的12級美顏模式（Make Up Mode），幫你祛除面上的痘痘、雀斑、毛孔等瑕疵，令皮膚看起來滑滑溜溜，更新增了12級美白模式（Brightening Mode），想好似韓國女星咁白滑話咁易，最重要係影出來的效果夠自然，唔覺有「味精」。當你影完張自拍照，還可以透過創意繪圖功能修飾影像，不但可加入得意有趣的花花、星星等圖案，更能夠寫上文字和繪畫，而且仲有簡易拼貼功能畀你剪貼，玩法多到令你愛不釋手。
外框快門鍵設計
過往幾代「神器」在自拍時，需要一隻手持機，另一隻手篤芒或按快門鍵，用落其實唔係咁就手，所以TR15經過大幅改良，特別在外框增設快門鍵，單手持機時可同時自拍，而且360度的旋轉外框採用曲線設計，大大提升手感。備有桃紅、白、黑三種機身顏色的TR15，依然配備了王牌21mm超廣角鏡頭，令高炒自拍時臉部更削更尖，而且採用全新Exilim Engine HS3雙核心影像處理器，無論開機速度和處理速度都有顯著提升，加上改用了3吋92.1萬像素電容式屏幕，操作抑或繪圖的觸感爽快利落，睇相同取景一樣咁清晰。不單如此，TR15仲有十種濾鏡特效，等你可創作獨一無二的相片。
SPEC
感光元件：1,210萬像素CMOS
等效焦距：21mm
光圈：F2.8
屏幕：3吋92.1萬像素
感光度：ISO 100~3,200
其他功能：12級美肌功能、內置Wi-Fi
體積：128.9×61.6×14.9mm
重量：149g
其他自拍相機選擇：體感自拍Samsung MV900F
若然唔想捱貴價買「神器」，其實適用於自拍的器材仲有其他選擇，就好似Samsung MV900F，擁有180度Filp芒設計，反起屏幕就可以睇到自己個樣，咁就唔怕自拍時對錯位，此外仲有埋Wi-Fi功能。不過MV900F最耍家是隔空操控，只要啟動Gesture Shot Mode，就算同部機有段距離都控制得到，用手掌打圈做到Zoom In和Zoom Out，由上向下掃便會啟動3秒自拍功能，絕對係全新體驗。
反屏女友Panasonic Lumix GF6
專為自拍而設的DC仔，主要都係得Casio和Samsung兩大品牌，反而升格至無反相機會有更多選擇，Panasonic Lumix GF6就係其中一員。俗稱「女友六號」的GF6，備有180度反芒設計，篤一篤芒就會自動倒數3秒自拍，等你有足夠時間擺定甫士，而且佢仲支援Wi-Fi和NFC無線功能，對應主流的智能裝置，即拍即Share，易如反掌。
查詢：（a）2926 2300、（b）3698 4698、（c）2833 0955
