Alcatel One Touch Star 雙卡遊蹤

Alcatel One Touch Star $1,499

下個月就係旅遊旺季，大家係咪已經諗掂去邊玩呢？人在異地，梗係要第一時間買張當地SIM卡上網；唔想拆電、換SIM咁麻煩的話，雙卡手機就唔少得喇！Alcatel最近推出咗新機One Touch Star，最大賣點就係支援雙卡雙待功能，兩張SIM齊齊用，喺外地都可以隨時覆WhatsApp或查Google Maps啦！

Alcatel One Touch Star $1,499

雖然電池容量只有1,500mAh，不過隨機送多舊畀你，撐足一日都冇問題。

兩個卡槽只支援microSIM，用開傳統大SIM嘅用家就要換卡喇！

機背用上髮絲紋處理，感覺都幾高貴。

機厚7mm，唔算好薄，不過機面不大，都好揸手。

內置《我的足跡》App，透過GPS記錄用家去過邊，幾過癮喎！

支援招牌《Onetouch Cloud Backup》，可以將資料備份至記憶卡或Dropbox。

內置《SIM管理》，可以設定語音通話、訊息、數據等功能嘅預設主卡。

每逢撥號、傳送訊息前都會彈出Menu畀你揀卡，好清晰。

Benchmark分數其實都幾低，僅僅比單核機高少少。

試片
睇YouTube HD版《Man of Steel》試片，播放流暢，而且屏幕色水夠鮮艷！

同期仲有另一部新機One Touch Inspire 2，同樣係4吋雙卡機，機能比One Touch Star更入門；不過機價超抵，用來做後備機都好。

靚仔髮絲背

驟眼睇One Touch Star確實唔多似係一部平價入門手機；皆因設計相當精緻，機側沿邊特別用上銀色嘅金屬物料點綴，配合黑色面板，都有少少似iPhone 4。而翻開機背亦有驚喜，整個機背都加入金屬髮絲紋，仲帶有幾分旗艦機嘅氣派添！而今次筆者手上嗰部黑色測試機，大路易襯，官網表示原來仲有銀、白、粉紅配色，而機面就係白色，顏色超夾，應頗得女士歡心。

靈活應用

睇番Alcatel資料，原來此機於外國推出時，有分單卡同雙卡版本，而今次行貨就屬雙卡版本。一如其他雙卡機，One Touch Star兩個SIM卡槽都支援GSM四頻制式，而其中一張SIM卡更兼備3G上網功能，一張卡煲粥、另一張卡玩FB就夠晒方便。此外，每逢撥號、傳送短訊前，系統都會畀你揀選SIM卡；用家亦可以隨時切換主卡，加上接收訊號等Icon都以不同顏色區別，包保唔會混淆。

靚芒加分

既然One Touch Star主打入門市場，對機能嘅要求自然相對地低。此機只搭載1GHz雙核心處理器及512MB RAM，運行Android 4.1系統及基本操作都算流暢，不過玩大食嘅賽車以及射擊遊戲，就明顯出現窒機，效能一般。雖然機能麻麻，卻另有靚芒挽回分數，4吋屏幕特意採用AMOLED素材，對比度、亮度都好高，用嚟睇片效果都唔錯(口架)！