超限量特別版MINI Cooper S Works Edition
MINI成日「玩嘢」,每隔一段時間,就會推出特別版本,令新鮮感一直高企,近日就有MINI Cooper S Works Edition,加裝大量JCW配件,賣相更加型仔,仲有兩款專屬車身顏色,好似今次測試嘅火紅色版本,揸出街肯定引人注意,夠晒張揚!不過講明先,Works Edition嘅數量極之有限,只得10部輸港,絕對係有買趁手。
MINI Cooper S Works Edition
專屬車身顏色加上雙直間拉花,注目度自然直線急升。
門檻都有JCW字樣點綴,凸顯特別版嘅身份。
MINI圓渾化嘅車廂配套,照樣搬到Works Edition身上。
透過MINI Connected嘅小旋鈕,就可控制各項音響及通訊設定。
車廂以黑色為主,加入唔同色調嘅飾板,生色不少。
新裙腳附有導流鰭片,藉此加強跑感。
全車用晒真皮座椅,特別版又點會失禮。
老老實實,後排空間只算一般,女仔或者小朋友坐為上算。
前天窗、後天幕設計,開揚度絕對有交代。
1.6L直四Turbo引擎好力又慳油,高度切合香港嘅路面環境需要。
中控台與波棍台都排列有序,就手又易認。
尾箱標準容量達160L,若然收起後排,仲可以一舉增加至680L。
車身加裝JCW包圍,加埋中置式雙尾喉,同原裝MINI相比,個樣真係惡得多。
引言提及Works Edition有兩種專屬嘅車身顏色,今次就測試咗Chille Red版本,全車以火紅色為主,再襯上黑色車頂及雙直間拉花,大玩撞色效果;另一款係Midnight Black黑色車身襯白色車頂。顯而易見,兩個版本一冷一熱,無論係熱情奔放或者Cool到爆嘅MINI迷,都有各自適合嘅Best Choice。
車廂設備落足本
今年夏天嚟得早,不停落雨之前,幾乎日日氣溫都30℃以上,如果畀你再望到呢部火紅色嘅MINI Cooper S Works Edition,睇怕心情會更加Hot!雖然呢款特別版冇JCW之名,但有JCW之實,事關加裝咗大量JCW配件,車身就有一整套JCW原廠包圍連裙腳,令車身好似Load低咗、貼晒地,至於17"JCW Cross Spoke Chellenge鋁合金輪圈,就比原來嘅粗框式輪圈精巧、講究得多。車廂方面,打開車門就見到JCW門檻,連細微處都唔放過,至於黑色內籠就有唔少電鍍裝飾,加埋全真皮座椅、多用途軚環、兩幅式天窗天幕,以及方便泊車嘅泊車距離警報系統(PDC),隨車設備相當豐富,而且統統已經包括喺$388,800車價之內,見出今次嘅Works Edition唔只有Gimmick,仲相當划算。
低重心攻彎爽
夠晒花巧之餘,Works Edition亦秉承咗MINI一向嘅好玩作風,就係靈活過人嘅Go Kart操控特性,事關用咗運動型強化懸掛系統,穩定性及操控性都同步提升,特別係攻彎期間,低重心嘅車身令轉向依然準確自如,就算之後高速直路狂奔,仍然穩定如常。動力方面,1.6L直四Turbo可輸出184hp馬力及24.5kgm扭力,如果用埋Overboost大油起步,扭力仲可以谷到26.5kgm,分外令人興奮。雖然力量表現夠晒Power,但係拜細容積引擎所賜,綜合耗油量只有6.4L/100km,計落油費只係$1.1/km左右,仲唔係好消息?
SPEC
車型:三門四座位揭背車
引擎:直四Turbo
容積:1,598c.c.
最大馬力:184hp/5,500rpm
最大扭力:24.5kgm/1,600-5,000rpm(Overboost 26.5kgm/1,700-4,500rpm)
驅動:前置引擎、前輪驅動
傳動:六前速自動波
懸掛:(前)麥花臣 (後)多連桿
制動:(前/後)通風碟
車身體積:3,729×1,683×1,407mm(長×闊×高)
綜合耗油量:6.4L/100km
售價:$388,800起
查詢:3193 6800(MINI HK)