七個位最實際 Honda Stepwgn

雖然載客量大係MPV嘅最重要賣點，市場上亦有唔少八座位車款，不過又有多少機會坐得滿？與其長期擺張空櫈，倒不如減少個位，坐得鬆動啲仲好。近日本田（Honda）追加咗Stepwgn七座版，車廂空間依然闊落，中排就改放兩張獨立座椅，手枕打孖上之餘，又有軟稔度適中嘅座墊，可以坐到大爺咁款，比起坐Bench Seat爽得多。

車頂設有巨型天幕，前、中、後三排都可享開揚景致。

後排座椅可以完全收喺地台底，騰出大片置物空間。

後排空間非常寬敞，腳部有充足嘅伸展空間。

A柱下方設有反射鏡，左邊車頭與牆身距離一目了然。

中排只設雙座椅，個人空間當堂鬆動晒。

採用一梯級式地台設計，上落方便過人。

引擎動力輸出線性，加速平順流暢。

測試車預載咗免提系統，可用藍芽與手機連接。

尾牌上方裝咗鏡頭，倒後泊車放心得多。

車身雖大，但係拜HSA所賜，上斜起步都唔會溜後。

每日揸車返工放工，假日又要載埋家人出街玩，如果部車「大食」，油費開支認真唔少嘢。Stepwgn用咗本田Earth Dreams Technology，從i-VTEC引擎、無段變速波箱、車架設計以至內籠布局都以節油為大前提，配合智能怠速停止系統（Idle Stop），以現時日本嘅「JC 08」輕型汽車測試標準嚟計，耗油量只有14.4km/L，油費計落只係每公里$1.2左右；Idle Stop係Stepwgn慳油嘅重要法寶，停車等候時會自動關閉引擎，期間一滴油都唔使用，但冷氣依然如常運作，係咪正先？

離地距低　進出夠方便

日系MPV賣到一街都係，事關設計上迎合到本地消費者要求，雙電動趟門、後排冷氣等設備已成為梗局，冇先至奇，Stepwgn嘅內籠布局仲好User-friendly，想收起中、後排座椅，兩、三下動作就搞掂，譬如將後排收藏喺地台底，只要一拉、一扳、一扣就成事，成個過程唔使五秒，而且不費吹灰之力。若然家中有長者，考慮到上落車廂嘅便利性，Stepwgn既有同級獨創嘅一梯級式地台，地台仲低至390mm，上車時毋須大動作跨步，一檻就到位，加上車廂比房車高，唔易頂頭。

追加HSA　放心斜路起步

身為MPV，馬力表現絕對唔可以曳，事關滿載之下，負重閒閒哋有300、400kg，馬力差少少，上斜都會搞到「拉牛上樹」，但係另一方面，大馬力又好易導致耗油量高，所以揀車時最好採取中庸之道，起碼油費、牌費、保險費都平啲。Stepwgn所用嘅2.0L直四i-VTEC引擎就有150ps馬力，配合經過重新調校嘅無段變速波箱，力量足以應付本地嘅路段需要，加速暢順度亦比上一代好得多，乘坐質素更上一層樓。加上隨車跟埋斜坡發進輔助系統（HSA），喺清水灣道（德望對開）燈位起步，右腳鬆開迫力，再施施然移過油門畀油，期間筆者刻意拖慢動作，Stepwgn喺大斜坡都冇溜後，新牌仔都應付得到。