和風盛宴DoCoMo F-06E

$5,680

暑假就到，日本係好多人旅遊首選，不過去親日本都要租手機，就算用番自己部電話亦因制式問題而只能用3G網絡，慢人一截！與其咁麻煩，計我話不如索性買部日系水貨機，香港用到之餘，帶去當地仲行到4G網絡，上網爽到震！最新推介有呢部DoCoMo F-06E，集5.2吋高清芒、防水、1,630萬像素鏡頭及128GB超大容量於一身，規格之強猶如一餐和風盛宴，遊日一定要帶埋佢去！

$5,680

預載DoCoMo UI介面，「羊執事」會在主頁走來走去，並提供12版首頁。

附送專用充電座，叉電之餘仲可放大聲音。

提供1,630萬像素鏡頭，下方更設有指紋識別器，可用指紋開機。

每個接口都有防水膠邊保護，唔怕入水。

一體成型設計，microSIM及microSD卡要從機頂插入。

9.9mm機身唔算薄，微彎機背卻改善了手感。

內置天線，雖然香港用唔到，但去到日本則可收看電視。

屏幕支援「Super Clear mode」，可增強影像對比度，令戶外觀看更清晰。

Benchmark得分僅落後於S4及新HTC One等機王，交足功課。

提供繪圖功能，可在屏幕擷圖上任意鬼畫符，十分過癮。

Slide Launcher容許單手快速開啟相機等工具。

支援Dolby Digital Plus，能因應不同場合提升音色質素。

Slide Display可把網頁下移，用戶毋須伸長手指公都點到網頁頂部。

跟新 HTC One（右）比較，F-06E屏幕稍大，顏色較暖，而前者則偏向自然，各具賣點。

日本網絡商興季節性出機，一年出四季。據三禾電氣負責人Simon表示，以往日系機愛玩款，但今夏卻改走平實路線，賣高速與慳電，告別舊時的Crossover機及女人機；雖然Fans們一時未必接受到，但卻可令日系機與世界接軌，例如今次F-06E的規格便比很多韓國手機還要強，難怪甫推出就勁多人問有冇貨啦！

清新外表一米防水

雖然改走平實路線，但F-06E始終流着東洋血，外形依然不老套。機身是日本人最愛用的珍珠白，表面經過霧面處理，給人一份很清新、簡約的感覺。屏幕則有5.2吋之大，但由於用上窄邊框設計，所以機身寬度可減至70mm，比S4、Xperia Z等5吋機還要窄，配合微彎機背，手感相當好。一體成型的它每個接口均加入防水膠邊，令它符合IPX8防水標準，於一米水深下可運作30分鐘，帶埋去浸溫泉都得！

像素最高優化音效

此機的「影」、音功能亦很強，先說「影」，鏡頭像素是今夏日系機中最高的1,630萬，並支援連拍、全景及1,080p全高清攝錄，相片更會自動執行色彩校正，雖然有一定味精感覺，但色調及對比度提高後，陽光底下觀看其實更適合。至於音色，則支援Dolby Digital Plus，能對音樂、電影及遊戲等不同需要進行音效優化，配合能放大聲音的專用充電座，成班Friend圍埋都聽得一清二楚！

鯨級容量單手操控

硬件是此機是另一強項，1.7GHz四核心處理器及2GB RAM不算出奇，最意外是內置容量竟然高達64GB，若再插入microSD卡，最高容量就達到128GB，旅行時影相唔使就住就住！介面則是常見的DoCoMo UI，但廠商卻在「羊執事」及下拉式選單外，再加入Slide Launcher及Slide Display兩個操作模式，前者是一個圓形轉盤，方便單手快速開啟相機及瀏覽器等工具；後者則可把網頁整個向下移，令單手也能靈活地移動網頁，設計細心。