洛杉磯直擊 E3第三炮 PS4實試畫面靚好多
Sony PlayStation 4亦趁今年E3公開真身，其外形設計在坊間都有唔少好評，E3會場更有數十部PS4試玩台畀參觀者試玩，其中比較有睇頭是幾套獨佔的歐美作品《inFAMOUS：Second Son》、《Knack》及《Killzone：Shadow Fall》，畫面表現確實比PS3時更靚更紮實！惟日系遊戲方面還未發功，例如已宣布將會同時登陸Xbox One的《Final Fantasy XV》同《Kingdom Hearts》都未有得公開試玩！
洛杉磯直擊 E3第三炮 PS4實試畫面靚好多
PS4主機機面採用兩截不同質感的設計，上方是鋼琴黑反光面，下方為磨沙黑。
新DualShock 4手掣體積較之前DualShock 3為大，而中央觸控區加上了Share掣及Option掣，惟暫時未知用途。
這條會場通道最能表達今年次世代主機短兵相接的實況。
機背連接介面及電源線巧妙地隱藏在排氣口上。
DualShock 4無線手掣會在手掣頂部用上不同顏色來識別玩家，跟PS Move Controller設計相似。
《Knack》要控制能吸食黃色晶體變大的機械人打倒敵人，儲滿一整個黃色圓形能量，即可按圓形掣出必殺技。
《DriveClub》試玩前會用鏡頭為玩家影相做Avatar，但鬥足兩圈後又未發現遊戲有幾高質素。
《Killzone：Shadow Fall》畫面表現細緻，背景的樹葉跟流水都充分發揮PS4的機能。
PS4的定價較Xbox One便宜，北美、歐洲及英國定價分別為399美元、399歐元及349英鎊。
PlayStation展區提供了數十部PS4實機供試玩各款新遊戲。
會場內設有十台駕駛座供試玩《GT6》，不過只能在賽道上試車，少了一份競賽感。
展覽館場外一樣設置了《GT6》駕駛座試玩。
Nintendo Mario孖寶出擊
剛宣布會在Xbox One平台上現身的Xbox Live Arcade遊戲《Crimson Dragon》，現場反應都相當唔錯。
更新後的SmartGlass，既可連接遊戲取得資料，亦可串流儲存於主機內的多媒體內容。
Xbox 360薄身主機設計將會「Xbox One」化，最平定價為199.99美元。
現場幾十台PS4實機試玩
PS4主機外形確實幾醒目，側面看似是由兩塊平行四邊柱體組成，中間凹下去的空間為碟盤及各種連接端子。現場所見，PS4機身大小跟薄版PS3主機相差無幾，至於幾十台PS4實機試玩台分布在會場的公開試玩區及重點遊戲專屬試玩區內，不過所有PS4主機都密封在玻璃箱之內，想近距離接觸都唔得！Sony展區可供試玩的PS4遊戲大約有十款左右，不過欲率先體驗PS4的參觀者確實唔少，要排隊輪流試實在唔夠時間，最後在SCEH公關幫助下，才可深入特別展示室試玩好幾款PS4遊戲。
PS4新作先評：《Knack》有創意
小記試過王牌射擊遊戲續作《Killzone：Shadow Fall》及王牌動作遊戲續作《inFAMOUS：Second Son》，雖然跟前作分別不太明顯，但畫面表現確實有所提升，尤其是《Killzone》場景細緻度更值得一讚。
在《GT6》同場展示下，PS4賽車遊戲《DriveClub》顯得平平無奇，較有創意是二月已隨首個PS4發布會現身的《Knack》，玩家要控制機械人打低眾多敵人，途中更可藉取得道具令身體變大，亦可分身通過紅外線監察器，玩落有點似是《古惑狼》加《塊魂》。另外要提的是隨PS4推出的DualShock 4無線手掣，雖然體積略大，但手感則跟PS3的DualShock 3手掣相差無幾，不過暫時仲未摸清到底中間可按下的觸控板跟兩旁的Share掣及Option掣的用途。Sony在E3已公布了歐美價錢，如北美售價為399美元，但幾時登陸香港及售價等資料，就要等官方進一步公布。
除PS4遊戲矚目外，當然亦不能不提將會在PS3上推出的《GT6》，除在場內擺放了十個駕駛艙及真車宣傳外，在場外亦搭了駕駛艙試玩台等玩家體驗真實賽車感覺，果真大手筆！
Nintendo Mario孖寶出擊
另外兩間廠商都有新遊戲主機推出，Nintendo今年「低調」起來，取消展前的發布會，改為網上發布。雖則低調，但可供試玩的Wii U新遊戲都唔少，如預定明年春天推出的《Mario Kart 8》以及今年底推出的四人對戰《Super Mario 3D World》。《Mario Kart 8》玩法跟舊作都大同小異，今集重點是加入反重力賽道，可以垂直在牆壁上行走，E3現場試玩雙打時是用GamePad加上Wiimote手掣，而GamePad上的小屏幕可顯示地圖及排名。
至於《Super Mario 3D World》可四人合力冒險，每個角色各自有擅長能力，另亦導入「貓Mario」升級技能。Mario打孖上場加上今年內推出的《Wii Fit》、《Wii Party U》、《The Wonderful 101》以及《薩爾達傳說：風之律動HD》，Wii U都有望翻身！
Xbox 出薄版360主機
香港好有可能未必跟美國同步在11月推出Xbox One，似乎Xbox 360主機壽緣未盡。Microsoft亦趁E3發表用上Xbox One設計的薄版Xbox 360冧玩家，4GB版售199.99美元，連埋Kinect都只係299.99美元，都算合理。一招都未夠，Microsoft仲推出Xbox Live金會員每月免費下載的兩款Xbox 360遊戲計劃，此計劃由今年7月開始到12月止，而可免費下載的遊戲來頭都唔弱，包括有《Halo 3》及《Assassin's Creed II》等。
至於三年前已公布的Xbox Live Arcade日系飛龍遊戲《Crimson Dragon》亦正式在E3公開試玩，要用上Kinect體感方式操控飛龍作戰。雖然E3現場反應都唔錯，不過廠方上月話遊戲會在Xbox 360推出，到E3時卻改口為Xbox One，亦即話玩家又要等多半年！
