防潮耳機 炎夏動樂

近年耳機成為潮物，唔少品牌都踩過界聯乘出耳機，今次就輪到Puma。新作Pro-Performance Sport-Bud外形Sporty，最啱一邊跑步、一邊聽歌，夏天Keep Fit都事半功倍。耳機特別採用掛耳式設計，耳鈎可自行調校弧度；配合微微傾斜嘅入耳式設計，確保左郁右郁都唔會整甩隻耳機。另外仲特別支援防潮功能，就算跑步、做Gym成身大汗都唔驚汗水整壞隻耳機。音質方面，採用14.8mm鋁製Acoustic Chamber單元，音質都唔太差，低音效果仲幾突出添！值得一提，耳機設有手機專用咪高峰線控，調校音量、播放、暫停音樂以至接聽、結束通話都可以用線控搞掂，使用時更加方便。