Samsung ATIV One 7 27"吋電視電腦二合一

$15,980

身邊好多朋友屋企已經再無個人電腦，覺得有平板或Notebook已足夠。因此，一眾電腦廠商都開始將電腦整合到電視之上，就如這部新推出的Samsung ATIV One 7 27吋觸控式一體化個人電腦，既收到電視頻道，又可用盡27吋顯示屏以觸控方式玩Windows 8各種功能！而且當接上Galaxy手機後，更能用上《SideSync》功能，只需用鍵盤同滑鼠就可將電腦上的文字複製到手機兼玩手機Apps，夠方便！

$15,980

始終畫面太大，觸控操作時未算太順手。

底腳的設計跟新款的SMART TV如出一轍。

所有連接介面包括天線、電源、網絡等都設於機背底部，不太礙眼。

始終香港唔流行內置藍光碟機的電視機，已內置藍光碟機的ATIV One 7相當實用。

跟機設有無線鍵盤跟無線滑鼠。

27吋全高清屏幕加上不俗的內置揚聲器，試睇《悍戰太平洋》全高清預告片時，真係感受到戰爭的震撼。

《SideSync》應用程式具備了「Phone Screen Sharing」以及「Keyboard／Mouse Sharing」兩項功能。

《SideSync》能將已連接的手機當成第二個顯示屏，手機跟電腦之間可互相Copy & Paste資料。

開動《SideSync》應用程式的「Phone Screen Sharing」後，可以在顯示屏上同步顯示手機畫面。

硬件規格屬強配，除了硬碟機並非SSD而令得分較低外，其餘各項Windows體驗指數都達7.2或以上。

大畫面玩Windows 8

Samsung近期將全部行Windows的電腦產品撥歸ATIV品牌，其中ATIV One就係代表一體化個人電腦，比起以前的命名方法更易記。打頭陣係這部電視電腦二合一的27吋全高清屏幕ATIV One 7。齋睇外形只會覺得佢只係一部電視，實情是裝配了一塊27吋十點觸控式顯示屏，可以用大畫面玩Windows 8，相信大家之前都未試過！不過實際試用時，捽畫面時未算太靈敏，由上至下拉關掉程式都幾吃力，都係用番跟機的無線鍵盤跟無線滑鼠好過。

強勁規格可播Blu-ray

27吋畫面都幾適合房間使用，而ATIV One 7的外形亦頗吸引，如幼邊框設計、弧形鋁質金屬底座以及設於機背下方的「隱藏式」連接介面；特別在顯示屏可作20度傾斜調校，符合不同環境的擺位需要。不過ATIV One 7仍是用第三代的Intel Core i7處理器，並非這星期剛出場的Haswell第四代Core處理器，不過作為個人家用電腦來說，其實分別不明顯。硬件規格方面亦屬強配，如用上8GB記憶體、1TB硬碟機、AMD Radeon HD7850M獨立顯示卡，而且更內置埋Blu-ray碟機，毋須另駁影碟機即可睇藍光影碟，要知道香港不似得日本有內置Blu-ray碟機的電視發售，家陣一部ATIV One 7就可玩盡家庭娛樂功能。

手機連電腦更好玩

好多人玩手機多過玩電腦，因此今次Samsung就聰明地加入了連接手機的《SideSync》軟件方案，令電腦及手機之間交換資料變得更方便。當在Galaxy智能手機及電腦各自裝上《SideSync》應用程式後，只需用USB線連接、再開啟程式，即可把手機畫面當成第二個屏幕一樣，可以直接用電腦的無線鍵盤及滑鼠操作手機上的程式，亦可直接用鍵盤打短訊，甚至乎可將電腦上的文字資料複製到手機，慳水慳力。另外亦可將Galaxy手機畫面同步到電腦之上，單睇電腦屏幕即可管理手機內容，同時手機資料亦會自動備份到電腦，極其實用。至於其他Windows 8 Apps就跟之前Samsung電腦無分別，如《S Player》影片播放程式、《S Gallery》相簿、《S Camera》影相程式及《Evernote》多功能記事程式都有齊。27吋型號硬件高功能強，但定價都幾貴，如果預算有限，可考慮用上Core i5處理器及AMD Radeon HD7690M圖像處理器的23吋型號ATIV One 7，定價平$4,000。