6.1吋Ascend Mate 屏霸

$3,680

智能手機任你吹到天花龍鳳，但遇着無電一樣迅速被KO，若果成日要帶多個「尿袋」出街，就真係智能都變傻仔！Huawei新機Ascend Mate就冇以上問題，皆因電池容積高達4,050mAh，比一般手機大足一倍，實測見玩足兩日都依然有電；而且16比9屏幕有成6.1吋咁大，成班波友圍埋睇NBA Playoff都一清二楚，爽呀！

$3,680

採用自家製的Emotion UI，最多提供九版首頁。

用6.1吋大芒觀看NBA Playoff，基本上毋須電視台Close-up都知邊個打邊個，睇波一流！

提供「單手操作」功能，撥號介面可按需要左右移動，唔使雙手拎機。

取消App Drawer，所有程式直接放在首頁，感覺似iOS咁方便！

提供大量主題布景，使用後連牆紙、鈴聲都會一併改變。

「懸浮按鈕」把常用功能整合為一，去到邊都可以隨時開啟。

除了光暗，還可更改屏幕的冷熱色溫，方便唔同環境下應用。

有圖為證，用足兩日都依然有32%電量剩！

試相
支援HDR，昏暗環境下仍保持一定亮度，不過快門有少許遲滯，令相片未夠清晰。

跟Sony Xperia Z（左）比較，雖然Ascend Mate屏幕冇咁光，但尺寸就明顯大好多，而且顏色較為飽和自然。

內置800萬像素BSI鏡頭，支援自動對焦及1,080p高清攝錄。

機身最厚及最薄處分別只有9.9mm及6.5mm，以大芒機來說唔算厚。

一體成型SIM卡要從機頂插入，另留意此機只支援3G，制式有點落後。

受Samsung Galaxy Note熱賣影響，Phablet長出長有，當中不少更是山寨廠出品，千多元人仔就有部巨屏機用，計落好似好抵，但其實質素參差，分分鐘隨時「死火」。相反，Ascend Mate雖同是國產，但就由名牌Huawei出品，質素有保證得多，而且屏幕更是當今最大，難怪今年四月在內地推出時，銷量可與iPhone 5並駕齊驅。

現今最大屏幕

若果不計未在香港推出的Samsung Galaxy Mega的話，Ascend Mate的6.1吋屏幕一定是當今最大，比Note II還要大多0.6吋，睇戲、上網毋須手指拖放，便擁有媲美電腦屏幕般的視覺享受。或許閣下會說屏幕不是全高清質素，但1,280×720解像度其實更符合16比9電影要求，而且IPS+面板顏色飽和度及可視角度都好高，在Gorilla Glass強化玻璃保護下，比不少FHD對手都更靚更耐用！

夠用兩天以上

屏幕大成咁，對手感、電池皆是一大挑戰，為此廠商特地進行優化。手感上，它採用了一體成型設計，表面光滑無縫，最薄處僅有6.5mm，令單手把玩仍有不俗手感。電池方面，容積是一般手機的一倍，達4,050mAh之多，官方指待機時間長達27天，狂煲3G電話也達23小時之久。小記起初也半信半疑，但當發現實測兩天內不停WhatsApp同上網，電池竟然仲有32%剩，而且期間沒有調暗過屏幕，便不得不佩服其省電技術。

單手操作介面

打從Ascend D1 quad起，Huawei已改用自家製的Hi-Silicon K3V2處理器，今次Ascend Mate亦不例外。以Benchmark測試，雖然得分跟S4、小米2S等機王相差甚遠，但試播1,080p高清片時都絲毫唔窒，證明這粒1.5GHz四核心處理器有一定效能。此機另一要讚是摒棄了公版介面，改用Emotion UI，不但取消了多餘的App Drawer，還提供「單手操作」及「懸浮按鈕」兩大功能，前者可把QWERTY及撥號鍵盤縮細再移往左右，方便單手控制；後者則把計數機、筆記本、電影及短訊四大常用功能整合為一，去到邊都可以一按即開，設計周到！