今年E3遊戲展可以話係近年最有分量，次世代主機紛紛出場，其中最矚目要算係剛在三星期前才正式公布的Xbox One。Xbox One挾住強勁機能、附上Kinect體感操控以及多元化的數碼娛樂功能，論全面性足可壓倒對手，而更強係首輪公布的Xbox One獨佔遊戲差不多套套都有睇頭，絕非靠續集食老本之作！

一如以往，Xbox E3展前發布會在洛杉磯Galen Center舉行。

新Xbox One手掣上的Trigger掣內藏震動功能，會場內就特別設置幾個體驗區等大家一試到底震得有幾唔同！

Xbox One將會在11月登場，暫時應未知香港會否是首輪同步推出的市場。

新Xbox One全面睇
機面用上兩種不同質感設計，碟盤位則用上鋼琴黑面質料。

Xbox主機機背設有頗完善的連接介面。

手掣左右Trigger掣（LT / RT掣）都內置震動器，可產生極真實的震動效果。

Xbox One主機設有Blu-ray碟槽。

新設計的Kinect感應器比之前更輕巧。

Xbox One只放在玻璃箱內展示，人人爭住影相，相當墟冚。

試玩版提供McLaren P1戰車，除了車身的反光位做得極真外，留意的是連天氣情況都超真實，光暈位都似到十足十。

現場特別提供駕駛座畀大家試玩《Forza Motorsport 5》。

McLaren P1戰車亦在會場攤位中現身。

唔係親眼見到，都唔信《Killer Instinct》原來咁受歡迎，個個玩到唔停手。

Xbox展區中《Ryse：Son of Rome》的試玩機數目最多，睇得出係最受重視的自家出品。

《Ryse：Son of Rome》畫面表現超班，試玩版中仲可命令士兵一齊拎起盾牌擋箭！

遊戲加入QTE玩法，只要在指定時間內跟畫面指示按掣，就可以用上各種殘忍手法解決對手！

展覽館大堂有個身高6米的Titan機械人模型，造型極有霸氣。

遊戲速度感強，仲可騎乘機械人作戰，玩法比一般射搫遊戲有趣。

要以一敵幾百喪屍唔容易，殺喪屍都要好有創意先得。

Capcom在房外安排了食緊人手人腳的女喪屍畀大家感受恐怖氣氛。

接手製作《Halo》系列的343整咗段好有型的預告片，介紹將於2014年推出的新《Halo》，片中只見有人笠起斗篷喺沙漠中前進，到最後一抬頭甩開斗篷先知係Master Chief！

發布會以小島秀夫《Metal Gear Solid V：The Phantom Pain》打頭陣，不過睇番段預告片又係沙漠同騎馬，都頗有《Red Dead Redemption》的感覺。

無線手掣再加震

在講新作遊戲有幾勁之前，當然要提一提Xbox One的機能。整套系統包括一部內置500GB硬碟機的Xbox One遊戲主機、新款Kinect感應器、全新設計無線手掣，以及為新會員提供共14天Xbox Live金會員資格。Xbox One主機換上新外形，無線手掣亦然，除了A、B、X及Y掣標示更明顯之外，在配備新震動設計Trigger掣下，可以跟手掣內置震動器各自產生兩種不同震法。

E3會場上特別有試玩台畀參觀者體驗新手掣的操控，初步測試比Xbox 360手掣更佳。產品定價方面，Xbox One套裝暫時只提供北美、歐洲同英國價錢，分別是499.99美元、499歐元及429英鎊，11月起開始在全球21個市場同步推出，照推斷應會趕及美國感恩節前應市，至於香港是否首發市場？大家要拭目以待喇！

重點獨佔遊戲：《Forza Motorsport 5》麥拿倫戰車坐鎮

類型：賽車

推出日期：2013年底

《Forza Motorsport》系列雖然差不多每隔兩年就有新一集推出，但次次都有驚喜；如今集《Forza Motorsport 5》就升級用上1,080p，加上每秒60格畫面展示，像真度超高！Microsoft仲將成架McLaren P1戰車放到E3會場宣傳，更設有駕駛卡座畀玩家試揸！值得一提，今集廠方唔用像真的AI做賣點，反而係透過Drivatar Technology去學習玩家的駕駛行為，令賽道上每個對手都具人性化，務求做到似同真人鬥車！

《Killer Instinct》經典格鬥重鑄

類型：格鬥

推出日期：待定

事前小記都估不到將一隻銷聲匿迹近十年的格鬥遊戲重新製作、並放在Xbox One上推出會引來咁大反應！除了在發布會上起哄外，E3會場八個試玩台亦經常客滿！重新製作的《Killer Intinct》速度感極高，一不留神中招隨時要硬食十幾Hit以上，小心！

《Ryse : Son of Rome》古羅馬大廝殺

類型：動作

推出日期：2013年底

眾多獨佔新遊戲當中，小記覺得最有霸氣要數這款羅馬帝國背景的史詩式動作遊戲《Ryse：Son of Rome》。玩家要扮演羅馬將軍Marius帶兵出戰，場面震撼。現場試玩版係由搶灘開始，拎起長劍加上盾牌上陣迎敵，埋身血戰時更會變成QTE模式，睇準時機跟畫面指示按掣就可用各式各樣殘忍絕招了結對手，譬如向頸後刺刀及用腳踩面等。玩到中段仲要帶領士兵一字長蛇陣舉起盾牌擋箭，真實感十足。在配合Xbox One強勁功能下，遊戲畫面超班，原來《Ryse：Son of Rome》正係由畫面高水準到不得了的《Crysis》系列製作團隊Crytek所開發！

《Titanfall》擊倒Titan機械人

類型：射擊

推出日期：2014年春季

在展前發布會上，壓軸介紹的正是由開發《Call of Duty》系列作Respawn主理的《Titanfall》，可見Microsoft對這款結合動作元素的未來射擊遊戲幾咁重視。E3會場雖未有得實試，但可以在閉門示範中睇見《Titanfall》別樹一格的遊戲玩法，玩家除了操控幾米高機械人外，途中甚至可彈出機艙爬到敵方機械人身上搞破壞，比一般射擊遊戲有趣。

《Dead Rising 3》力敵幾百喪屍

類型：冒險

推出日期：2013年底

前兩集《Dead Rising》都係Xbox獨佔，第三集《Dead Rising 3》亦唔例外。前作隨手拎起物件組合成武器打喪屍這一特點仍然保留，但係就玩得更激，例如電鋸唔止可當面鋸喪屍，連飛鋸都可以玩埋，將遠處喪屍鋸成兩截！今集由於主機機能強化，同一畫面可以出現極大量各有唔同攻擊動作的喪屍，現場試玩時，同一畫面有幾百隻喪屍撲向小記，相當誇張！

Xbox E3展前發布會花絮《MGS V》+ 新《Halo》Hardcore遊戲重點出擊

三星期前Microsoft在自家總部首度發布Xbox One消息時，枱面擺放了一部Xbox One原型機，反而在E3展前全球發布會時，就無再展示實機！是次發布會用了很大篇幅介紹各款Hardcore的Xbox One跟Xbox 360遊戲，只有小量時間示範Smart Glass的應用，很明顯看得出Xbox One首輪重點對象是Hardcore機迷。

Sony都在同日舉行了發布會，由於彼此分屬競爭對手緣故，隔空駁火總少不免，尤其是Sony PS4北美定價只是399美元，數字上確實較Xbox One的499美元便宜，但玩家可能忽略了Xbox One還附上可玩全身體感遊戲的Kinect感應器，考慮了這方面的價錢，其實兩者作價可說是相若。至於外形哪一方較優勝，就由玩家自己去判斷吧，但可以肯定的是從發布會上所展示的獨佔遊戲分量方面，Xbox One會較為佔優。至於香港會否可在今年內有得玩Xbox One，仍然是未知之數，作為香港機迷當然想聖誕節有啦！