除狐寶鑑
炎炎夏日，天文台幾乎日日都發出酷熱天氣警告，亦預告了接下來的7、8月都會熱到跳舞。不少女生都換上俏麗夏裝，紛紛以小背心，短裙仔示人，但若然一不小心散發陣陣汗味，就算靚到揼一聲都立即扣分！要揮別「狐狸味」，最重要掌握止汗妙法！
除狐寶鑑
花瓣浴 香噴噴
濃味煎炸 食少啲
小手巾
花瓣浴 香噴噴
相傳大美人楊貴妃之所以氹掂唐玄宗起個華清池畀佢浸浴，全因佢亦受狐臭問題困擾，惟有經常浸花瓣浴，等自己可以經常香噴噴咁侍寢。此法成本雖高，但勝在成件事美感十足，而且夠晒天然，隨時浸出一身花香引死仔添！
濃味煎炸 食少啲
體味的原因和飲食關聯甚大，因為食得多濃味食物，會令身體容易出油出汗，兩者混合，味道認真嚇人，口腹之欲同乾爽無味，兩者衡量吓，醒目嘅都識揀啦！
人肉Slow Motion
郁得多就自然容易出汗，出得汗多就自然有汗味，一於減慢所有動……作，似足王家衛電影中那些主角定格但背後人群猛郁咁，出少啲汗咪自然冇咁大陣汗味啦！
退熱貼降溫
雖然天氣熱辣辣，但唔出街是無可能的事，那就要諗諗辦法降溫。將小朋友發燒時常用的退熱貼貼於背部，立即Feel到陣陣涼意，暑氣全消。
除汗腺 一了百了
有汗臭當然不是罪，但唔解決就係問題！若然上述方法都對你無效，做汗腺切除手術會係唯一出路。以手術將皮膚下的汗腺及頂泌腺切除，咁就可以同汗臭說聲Bye-bye啦！
醫師教路：肝熱令汗水帶異味
排汗是一件正常事，但汗理應無味無臭，若然有味，穿着白色Tee時更會染上黃色污漬，問題應是出在身體機能上。註冊中醫師陳玉瑜表示，女生受經期影響，導致汗味更容易散發出來，特別是腋下、腳部和下身，另一原因和飲食偏重濃烈口味，造成肝熱，身體無法排清毒素下，排出的汗就會帶有異味。最有效的方法是少吃濃味食物，令身體的肝熱盡量減少，其中杧果、荔枝等濕毒食物更要少吃為妙。亦可趁夏天自製清熱解毒湯水，將橄欖和紅蘿蔔煲水飲，祛濕一流。
Tips：汗巾隨身
不論你是略施脂粉的女生，還是愛好艷麗打扮，反正一流汗妝容就容易化開。拿出紙巾抹汗時，更有可能於面上留下紙巾碎，相當煞風景。倒不如買番條靚靚小手巾隨身攜帶，一流汗就拿出來印幾印，又可根據自己的喜好選擇繡花或卡通圖案，仲好環保添！
