每年Apple全球開發商大會（WWDC）前夕例必謠言滿天飛，隨着首日嘅Keynote完結，謎底正式揭曉。雖然言之鑿鑿嘅「iWatch」、平價版iPhone最終都冇出現，但依然令在座嘅傳媒及來賓拍爛手掌，原因係今年做主角嘅軟件竟然帶畀大家無限驚喜，先有追加地圖、Tags嘅OS X Mavericks；再有全新設計嘅iOS 7，無論外觀、功能都來個360度轉變，確實有耳目一新之感覺！

新介面連解鎖方法都改埋，就連密碼按鍵都轉成圓形。

大部分Icon都重新勾畫過，新鮮感十足。

電郵同樣採用簡約風格，介面幾清晰。

MultiTasking介面加入縮圖，切換程式時就更加就手。

Control Center快捷鍵嘅用法有啲似Android嘅Status Bar，不過睇落功能仲多啲。

相機加入即時預覽濾鏡效果，以後連Download整相Apps都慳番。

相簿識得依地點、時間、活動分類，有系統得多。

AirDrop用法簡單，同一Wi-Fi網絡下就可以點對點Share相片同影片，超方便。

Siri就加入咗男、女聲選項，仲可以直接叫Siri開啟藍芽等功能，又或者叫佢上網搜尋，醒目咗好多！

App Store終於支援Apps自動Update，仲可以幫你搵到附近嘅熱門Apps。

新串流音樂服務iTunes Radio可以根據喜愛嘅音樂類型免費自訂音樂電台，可以於iTunes Radio下載歌曲，概念唔錯，不過香港用唔到。

新增iPhone啟動鎖功能，一定要輸入Apple ID、密碼先可以執行關閉Find My Phone、刪除數據、遠端刪除數據等設定，萬一唔見手機都唔怕個人資料外洩。

OS X Mavericks預覽
加入Tags功能，文件多多嘅朋友就可以有效分類喇！

支援多屏幕顯示，剪片、執相嘅用家啱使！

iCloud Keychain可以儲存你嘅網站登入資料，下次登入時就會自動幫你填寫。

可以直接喺Notification Center接聽Facetime，又幾方便喎！

地圖似足手機玩3D實景，電腦大芒下睇得更舒服。

其他噱頭
Mac Pro體積只有舊一代嘅1/8，的骰之餘，外形仲好High Tech！

新版本AirPort Extreme支援802.11ac制式，可作無線Router之用。

MacBook Air價錢合理，加上電池超強，應該有市場！

會場花絮
照舊喺三藩市Moscone West會場舉行，咁大個Apple Logo實唔會去錯地方。

WWDC可以話係科技界盛事，各地傳媒早早已經喺場外霸定位。

當地時間早上十點就開始Keynote一早就有飲品、麵包畀你頂肚，好貼心。

數千人聚集等開場，場面幾墟冚。

未開始時Banner都有黑布封實，估唔到佢出咩，一揭盅結果就係iOS 7！

在場擺咗幾十部iPad，目的就係將App Store上面嘅Apps大晒冷，非常壯觀！

行家點睇？
行家荷蘭記者Michel Elings：「好鍾意iOS 7同Mavericks兩個軟件，介面設計好靚，而且新功能都相當實用呢！」

OS X Mavericks 加Tags易分類

有用開Mac機都知，近幾次嘅大更新都加入咗唔少類似iOS嘅功能，今次都唔例外。新功能就包括地圖（Maps）、電子書（iBooks）、日曆（Calendar），而且用家仲可以將Mac上面嘅地圖資料分享畀手機，愈來愈互動！此外，Mountain Lion引入嘅Notifications Center功能亦有大更新，大家可以直接喺通知欄回覆訊息或者玩FaceTime，爽手得多。更方便的自然是Tags功能，因為可以將標籤（Tags）加在任何檔案上，分類更清晰，搜尋自然更有效率；而另一新功能係Finder Tabs，Finder視窗好似瀏覽器咁加入分頁，桌面以後唔會再有多個視窗立立亂，將文件左Drag右Drop仲好就手添！

iOS 7 新Icon新氣象

講外觀，OS X Mavericks可能唔夠突破，咁iOS 7就一定可以令你驚喜。Apple今次特別重新打造沿用多年嘅iOS風格，上至解鎖方式、半透明虛擬Keyboard，下至Apps圖示及功能都大革新；初次睇都有啲唔習慣，不過簡約風格確實幾美觀，難怪在場人士一見到新介面即刻熱烈歡呼！雖然格仔Apps格局、橫掃換頁嘅操作冇改變，但係就新增由畫面底部向上掃嘅Gesture，向上一掃即彈出新增嘅Control Center，開關Wi-Fi、藍芽、調校屏幕光暗、播放音樂等設定都整合做一頁，而且仲合併電筒、計算機功能在內，方便到暈。

十大新功能

Keynote入面講到明iOS 7有十個重要新功能，除Control Center夠創新，其餘新功能都一樣有睇頭。好似Safari嘅「變臉」就最犀利，版面唔同晒，就連開啟書籤、切換分頁都直接得多，加上網址列兼備搜尋功能，又追加埋全屏幕顯示，功能的確夠齊！不得不提嘅仲有MultiTasking及AirDrop，前者照舊按兩吓Home鍵就會彈出，不過就增設縮圖，一掃就即Kill Task，快捷得多；後者則是移植自OS X，用家只要連接同一Wi-Fi網絡，不需設定下就可以將相片、影片等分享畀朋友，照咁睇比NFC、藍芽仲爽手。其他功能方面，包括新加1:1比例及即時濾鏡嘅相機、按時間地點自動整理嘅相簿以及識得搵出所在地附近熱門Apps嘅App Store等等。可惜就係串流音樂服務iTunes Radio暫時得美國用到，稍嫌美中不足。

氣袋MBA 子彈Mac Pro

今年軟件成為主角，硬件自不然成為配角，幸好今次兩部新機都有唔錯嘅賣點。先講新一代MacBook Air，驟眼睇外表就冇咩特別，查實改用咗近期新出嘅Intel Haswell ULT處理器，大幅加強電池續航力，就以13吋機為例，竟然可以用足12小時，即使電池冇咁勁嘅11吋機都依然撐到9小時，以後拎去做Present真係唔使充電器隨身！最重要係新貨話咁快已經有售，13吋都只需$8,488，開價都算合理。另外，仲有現場唯一一部見到真身嘅高階機Mac Pro，暗黑設計似足一粒子彈，原來硬件都同樣夠堅，集Intel Xeon E5 12核心處理器、雙AMD FirePro GPU、PCIe快閃等頂級硬件於一身，官方話剪4K影片都冇問題，不過就未知幾時推出，想買機睇嚟仲要等一排。

查詢：800 908 988