零售價︰$1,380
預訂價︰$1,330
推出日期︰今年第四季
查詢︰2388 4677（Toy Hunters）

Hot Toys嘅Action Figure一向以頭雕嘅神似度而見稱，其實佢哋喺配件製作方面，何嘗唔係精雕細琢、鬼斧神工？好似啱啱發表嘅《G.I.Joe 2》大隻佬男主角Roadblock，當大家細心分析頭雕有幾Man、新Body有幾大隻時，HT就連佢嗰把百變「鐵蓮花」Brass Knuckles都做埋，而且跟足戲中道具設計，透過換件變成刀、槍、棍等武器，將Roadblock嘅戰鬥專家形象表露無遺。

零售價︰$1,380
預訂價︰$1,330
推出日期︰今年第四季
查詢︰2388 4677（Toy Hunters）

頭雕一望都算認得出係Dwayne，但表情太Chok，唔夠豪邁。

避彈衣以ABS及運動布一層層混合製成，加上多組索帶及安全扣，極具立體感。

Body有成30cm高，比起以往任何一款素體都要大隻。

Brass Knuckles可以換件變成匕首、手槍、警棍及刀仔等武器，而且一拔一插就裝到，So Easy！

左手戴有手錶及GPS定位裝置，前者仲有舊化，仿真度高。

HT以軍事人偶起家，軍靴當然難唔倒佢哋。

除咗Brass Knuckles嘅專用組件，隨盒仲有做工細緻嘅M249班用輕機槍。

為咗增加靈活性，所以手肘唔包膠，仲植入雙關節，藉此做到逾90°嘅屈臂幅度。

橢圓形地台及六隻造型手掌，都係預期之內嘅配件內容。

爆肌新素體

《G.I.Joe 2》係HT今年嘅重點Project之一，繼Snake Eyes及Storm Shadow後，第三款就係男主角Roadblock。呢位角色由荷里活B級動作王Dwayne Johnson主演，呢位前稱「The Rock」嘅摔角手出名四肢發達，為此HT特別重開新模，素體嘅胸、膊、手臂都專登加粗加厚，又喺手肘位植入雙關節，配合全身30個關節，大隻得嚟不失靈活性。不過Dwayne左臂原本有大大個紋身，但佢老哥話因為家庭關係，唔想印喺Figure上，雖然有啲失真，但為咗唔好教壞細路，相信玩家都會體諒啩！

頭雕出自台灣幫

頭雕方面，由台灣新進頭雕師Viva Lai及K.A.Kim合力炮製，輪廓、唇形、光頭及高寬嘅鼻樑都總算拿捏得宜，而且喺JC.Hong嘅塗裝之下，黝黑皮膚都能忠實還原，美中不足嘅係眼神未夠銳利，對此HT回應原本都想做得兇狠啲，但係同Dwayne本人磋商過後，最後應佢嘅要求，改成Chok Look表情，可能初辦過於木獨，先畀人神似度不足嘅錯覺。至於服裝方面，軍事Look簡直係HT老本行，迷彩軍服、防彈衣、槍袋及護膝等細節都做到足，重現昔日廠方軍事人偶嘅風采，Brass Knuckles更加跟足戲中設定，只要保留槍柄再插入唔同配件，就可變成匕首、手槍、警棍及刀仔，一把武器四種玩法，已經值回票價。

＊圖中為試辦款式，與正式推出的版本或有若干分別。