正邪萊卡 重現人間
獸神萊卡「咆哮版」（右）訂購價：$1,100（預定六月推出）
獸王黑萊卡（左）訂購價：$780（預定六月推出）
「獸神萊卡」何許人也？既是日本摔角手山田惠一的稱號，也是1989年一套日系科幻動畫的名字，當年無記都有播，不過兩者並無直接關係，後者的故事原著出自一代大師永井豪手筆，大Sell熱血劇情。事隔多年，港日合資品牌「千值練」再次谷人氣，繼「RIOBOT紅蓮螺巖」之後，挑戰可動人型Figure，即將推出主角「萊卡」以及宿敵「黑萊卡」，試辦所見健碩造型夠晒肌肉感，肩膀、髖部都有廣闊嘅活動幅度，可以擺出充滿爆炸力嘅出招甫士，加上專門店可預訂「店頭限定」嘅咆哮版本，相信唔少80後都會中招。
千值練RIOBOT《獸神萊卡》
獸神萊卡「咆哮版」（右）訂購價：$1,100（預定六月推出）
獸王黑萊卡（左）訂購價：$780（預定六月推出）
萊卡嘅金色面罩覆蓋晒本來嘅生化面孔，頭髮造型層次度高，又可左右擰動。
腳掌Ball Joint榫位採用斜向插入，接地性更加穩陣。
為火燄萊卡加裝飛翼配件，連埋專用台座，就可擺出凌空揮劍嘅招牌甫士。
「咆哮版」嘅造型比普通版更誇張，令甫士更有迫力。
兩款機體都可透過換件方式套入腕爪，扮狼人最啱。
棗紅色雷擊特效可以直接套喺拳頭上，可惜唔係透明膠料，氣勢打咗折扣。
萊卡盾可以收納萊卡劍，盾身及劍柄都有精細雕工。
黑萊卡跟專屬雙刃長矛，刃口及握柄採用分件設計，夠細心。
現年48歲嘅山田惠一，正係獸神萊卡嘅粉絲，1989年成為摔角手時，就以「獸神萊卡」之名上陣至今，據知其萊卡造型仲有七段變化，比動畫嘅萊卡更多花臣。
火燄萊卡重現人間
RIOBOT嘅獸神萊卡係官方首款可動人型機體玩具，由於佢嘅動畫原設比較人性化，所以關節設計特別注重躍動感覺，擺甫士仲要自然流暢，例如膊頭內藏延伸關節，藉此做到雙手揸劍，髖部及手臂外側嘅連接喉管就用PVC製成，彈性高，唔會阻礙手腳擺動，加埋腳掌及膝頭等受力關節都非常紮實，接地性又高，擺甫士分外穩陣。故事中萊卡可以進化為「火燄萊卡」，Boxset就以換件形式表達，只要拆走拳頭、換上套爪，腳掌及肩甲亦換埋巨大化嘅配件，再喺背部加裝飛翼，最後換埋獸形頭部就大功告成。至於喺專門店預訂先有嘅「咆哮版」，就追加咗擘大口嘅獸形頭部，雕工比普通版更加誇張，造型更有氣勢。
黑萊卡配專屬雙矛
相比金黃色嘅萊卡，同廠推出嘅獸王黑萊卡就用咗深沉嘅銀黑配色，至於關節設計以及撒亞人咁款嘅髮型，兩者都大同小異。武裝方面，萊卡及黑萊卡都有專屬嘅長劍及大盾，前者仲可以收喺大盾背後，盾牌表面刻上精細圖案，除此之外，兩者嘅手腕都可套上爪形武器，仲可以換裝雷擊特效組件。雖然黑萊卡不設變身Gimmick，不過多咗一柄專屬嘅雙刃長矛，握柄部分跟矛身採用分件處理，先將握柄套入手，之後再駁番上、下兩節組件，就唔怕刮花甩油啦！
查詢：2751 9018（熱血童盟）
