《Valhalla Knights 3》自創角色 7 vs 7

都隔咗好耐無PS Vita遊戲推出喇！今日面世嘅《Valhalla Knights 3》（英靈殿騎士3）應可吸引到一班日系RPG玩家嘅注意。呢隻遊戲設有相當靈活嘅角色創造同育成功能，以及可以做出系列中最大陣仗嘅「七對七戰鬥」等賣點；不過男玩家應該對遊戲內「歡樂街」裏面嘅活動較感興趣囉！

使出「爆發」招式，會在短時間內提升己隊戰鬥力。

遊戲設有七個種類、20種職業任揀創造角色，而且每個角色都有自己嘅性格。

喺敵人身邊可會執到各種道具。

歡樂街嘅女服務員差不多清一色性感打扮。

只要响「Sexy Time」內滿足女角並提升好感度，就可開啟特別任務。

接咩任務自己揀

《Valhalla Knights》上兩集分別於2006年及2008年推出，當年係PSP平台，今代就轉移到PSV，雖則體感元素及特異功能欠奉，但畫面表現都有進步。《Valhalla Knights 3》遊戲主要場景除咗有敵人盤據嘅傳統荒地「Field & Dungeon」之外，另一場景就係令人墮落嘅「監獄城」同「歡樂街」，屬於一般RPG遊戲少有觸及嘅場所。至於RPG遊戲核心係要完成各種任務，而《Valhalla Knights 3》內有兩種不同任務，如完成國家指定任務就會推進劇情；完成城鎮居民嘅委託任務，就可得到道具或強化身體嘅點數，玩家可以因應需要自行調度。

特別關係博好感

「歡樂街」亦即係花街，無論係接任務嘅公會「Star Kiss」、進行人體改造嘅「Happy Anatomy Clinic」以至買裝備道具嘅商店「Bennett Company」等，服務員全部都係打扮性感嘅美女。如果畀到一定數量嘅金額，仲會觸動「Sexy Time」，跟女角發展特別關係，如果好感度上升到一定程度，即可開啟特別任務或者加入大隊幫玩家出征添！出征時，玩家除咗可以單拖出戰外，最多更可以帶同其他NPC組成七人小隊，玩到七對七大混戰。

睇準時機先擒隊長

遊戲採用無接縫式戰鬥轉換設計，喺荒野行動遇上敵人時，就會即時轉成戰鬥狀態。要控制一班隊友出戰並唔係易事，較聰明嘅做法係下達命令攻擊敵人指定成員，再逐個擊破。如果能夠先擊倒敵方隊長的話，就可以令敵方群龍無首，唔能夠下達集體指令，但遊戲唔會標示邊個係敵方隊長，要觀察對方嘅行動去判斷，考考玩家腦筋。另外亦可發動「爆發」令小隊所有成員嘅能力瞬間提升，從而扭轉形勢！

INFO

類型：角色扮演

開發：Marvelous Interactive

平台：PS Vita

推出日期：今天

售價：$388

查詢：2341 2356

上一則 :

下一則 :