回本靚扒半自助餐

當去茶餐廳醫肚都要五、六十蚊埋單，有時寧願付出多少少，去酒店舒舒服服食餐好。今個星期發掘到好去處，位於北角君綽海逸酒店41樓的Le 188。最近推出的半自助午餐，頭盤、主菜、甜品連咖啡或茶，每位收費$298，主菜仲有美國極佳級肉眼扒、美國特選級安格斯牛柳扒、加拿大3A級西冷扒等6款選擇，分量由8至12安士，淨食扒都回本！甜品方面，10多款蛋糕甜點，賣相與味道俱佳，還未結帳，朋友已講明一定要再來一趟眺望無敵維港景的闊太式聚會。