丑生王黑白Look
零售價︰$1,480
預訂價︰$1,430
「生、旦、淨、末、丑」，喺京劇中扮演諧趣角色嘅丑生，地位往往較低，然而喺《Batman》嘅電影世界，小丑偏偏係人氣No.1嘅歹角，而且好多時都比主角蝙蝠俠仲搶鏡！今時今日嘅丑生王，公認係已故嘅Heath Ledger，但亦有老影迷選擇元祖Jack Nicholson，為咗滿足一班新知舊雨，Hot Toys繼推出1/6 Joker 2.0後，近日再為1989年版本嘅小丑添新Look，頭雕服裝都獲阿Jack本人高度評價，重奪丑生王美名！
HT 1/6 DX The Joker（Pierrot Version）
零售價︰$1,480
預訂價︰$1,430
頭雕極度像真，最誇張係妝容下依然可見清晰嘅皮膚紋理，唔到你唔服。
跟番電影人設，忠實做埋波點煲呔及白色小背心。
踢死兔掛有毒襟花，細節跟到足。
附盒跟埋樓梯形地台，重現電影中一閃即逝嘅一幕。
Body依然有30cm高，但其實比舊版略矮，望落肥番少少，更似真人。
紳士鞋嘅鞋頭髹咗光油，燈光照射下頗有拋光感，猶如真鞋一樣。
雖然羽毛係膠件製成，但係雕工以至塗裝都幾可亂真。
紳士帽係膠件製成，並且可以除落嚟，變相玩多個造型。
造型手只有六隻，DX系列中都算少，猶幸握物、開掌等手形都總算有齊。
衣料升級柔軟貼服
論演技，兩代小丑或者不相伯仲，但係講造型，舊版小丑就豐富得多，唔計上次HT推出最經典嘅紫色「踢死兔」，屈指一算仲有黑白裝、落妝及片尾瘋狂喪笑三個Look，HT亦承諾時間許可嘅話，會將以上造型全部Figure化起來，實行買窮一班小丑迷。講番今次嘅Pierrot Version黑白小丑，黑色西裝外套、波點煲呔、格仔長褲及紳士帽全部做齊，布料仲比紫色踢死兔版本柔軟，而且冇咁易黐塵，擺Pose更Fit身之餘，玩家亦唔使日抹夜抹，慳番唔少保養工夫。
黃金組合炮製頭雕
素體方面一如前作，選用平胸窄膊款式，再加入大量海綿，但高度略減，驟眼睇就更加發福傳神。頭雕方面，上次已經被玩家以「神作」嚟形容，今次繼續由Yulli落刀、JC.Hong上色，唔只輪廓、皺紋、雙下巴等特徵都似足真人，眼珠移印亦更加像真仔細，
再加埋今次合嘴微笑又有「一點紅」嘴唇，陰陰濕濕，表情比上次嘅咧嘴Look更令人膽戰心寒，整體似成咁，難怪出名要求高嘅阿Jack都表示滿意收貨。不過有辣有唔辣，作為DX系列，除咗P.E.R.S.可轉眼球呢樣Gimmick保留落嚟，以往大堆頭配件已不復見，頭雕亦只有一個，配件就只有三支假羽毛，以及一個樓梯形地台，分量似乎削咗啲喎！
HT 1/6 DX The Joker（Pierrot Version）
零售價︰$1,480
預訂價︰$1,430
推出日期︰今年第四季
查詢︰2388 4677 （Toy Hunters）
