入門Fun享 Canon PowerShot A3500 IS

$1,380

家陣影相風氣已經唔同以前，唔一定要靚，但最緊要快，影完張相可以即時Upload上社交網站就Perfect，所以相機紛紛加入Wi-Fi功能方便Share。大家千祈唔好以為Wi-Fi係貴價機專利，好似Canon入門級PowerShot A3500 IS，售價千五蚊有找，已經有Wi-Fi功能，隨時Fun享。

$1,380

背面備有3吋大屏幕，讓用家能夠清晰地睇相或者影相。

A3500 IS有多色選擇，除Sharp醒紅色外，仲有黑白二色。

支援SD記憶卡和NB-11L鋰電池，大約可以影到200張相，ECO模式仲可以增加至265張左右。

五倍變焦鏡頭擁有28mm廣角，影人或影風景皆冇難度。

機頂印有「HD」和「Wi-Fi」字樣，表示機身內置720p拍片和Wi-Fi功能。

旁邊設有一個USB接口，用作傳送資料之用，不過並不支援充電功能。

十字操控桿備有ECO節能模式和Wi-Fi功能，使用更加直接，無需進入菜單逐項搵。

Wi-Fi功能的用途廣泛，能與其他相機、手機、電腦、打印機和互聯網配對。

按下機背「？」鍵，介面會說明各個按鍵嘅功能同用途。

當開啟ECO節能模式，相機會縮短進入待機嘅時間，大約可以慳30%電量。

若果要過相落智能手機或平板電腦，就要預先下載《Canon CameraWindow》App。

試相
五倍變焦能力連海中心嘅船隻都影到，而且畫面寬容度高，光位及暗位細節都清楚睇到。

內置Wi-Fi功能

Canon近來推出嘅相機，上至單反、下至DC都紛紛加入Wi-Fi功能，A3500 IS都唔例外，唔單止可以將相片無線上載至社交平台，甚至能夠透過《Canon CameraWindow》App，將影像傳送至智能手機或平板電腦，更可以將手機內GPS資料合併到影像當中，去過邊度影相一目了然。最重要是Wi-Fi能透過自家Canon嘅Printer無線打印相片，唔使駁線插卡咁麻煩。A3500 IS更追加了無線備份功能，可利用Canon Image Gateway網上空間過相落指定電腦，設定毫不複雜，簡單幾個步驟就搞掂。

ECO模式慳三成電

電子產品幾勁都好，萬一冇電就咩都做唔到。為免相機電量倒水咁倒，A3500 IS特別加入了ECO節能拍攝模式，佢會自動調整屏幕亮度，只要短短幾秒就會自動進入待機狀態，咁就可以慳番啲電，影多啲相。至於規格方面，A3500 IS採用咗1,600萬素及DIGIC 4影像處理器，用上28mm廣角五倍變焦鏡頭，以入門機來說算唔錯，拍攝一般生活照夠晒用。機背仲有3吋大芒，等你影相時可以睇得清清楚楚。

自動切換32種場景

對於要求較低嘅入門用家來說，規格未必係最重要嘅買機誘因，易用與否反而更重要。A3500 IS就內置咗自動場景偵測模式，能夠根據環境自動選取32種場景，用家無需為調校設定而煩惱；再加上閃光燈備有Smart FE智能功能，可判定主體距離，自動調校閃光燈輸出跟閃光燈同步，改善閃光燈曝光唔均勻之問題。如果要喺昏暗環境拍攝，A3500 IS嘅ISO 1,600感光度可能未必夠用，於是配備高達ISO 6,400嘅低光拍攝模式，就算手持影夜景都不成問題。