《Metro：Last Light》再戰核爆莫斯科
有時一隻Game做得好，都未必可以順利推出，今日介紹嘅《Metro：Last Light》就係一例。烏克蘭遊戲開發商4A Games喺2010年時，憑2033年核戰摧毀莫斯科嘅第一身射擊遊戲《Metro 2033》而「響朵」，本作係續集，點知因為發行公司申請破產保護，幾經延期，比原定遲咗成年先至出得到。講番新作，製作技術同遊戲性仍然好強，要打異種生物之餘，又要防範敵對人類陣營偷襲，不過遊戲最煞食都係戴住防毒面罩喺莫斯科地鐵大廝殺！
《Metro：Last Light》再戰核爆莫斯科
異種怪物未算得好猙獰，不過戰鬥力十足。
幸存人類因為要爭奪有限資源，醜陋人性出晒嚟。
要戴住防毒面具戰鬥，可以話係《Metro》系列嘅招牌。
就算上到地面，都只係一片頹垣敗瓦，而且掩護物亦唔多。
由於地面滿布毒煙，幸存人類惟有匿喺地底下生活，自成一個社區。
出版過程一波三折
《Metro 2033》背景設定於2033年核戰過後嘅莫斯科，幸存嘅人類要匿埋喺地下，既要應付地面上受輻射感染而突變嘅異種生物，又要同其他幸存嘅人類爭奪所剩無幾嘅資源，真係腹背受敵。原本續集係叫做《Metro 2034》，時間點就係第一集故事後之一年，遊戲Trailer早在2011年公布，仲預計2012年推出，可惜一波三折，原本嘅發行公司THQ因財政出現問題，搞到所有Project都推遲晒，仲話要延至2013年下半年先有機會面世。好在今年一月4A Games終於搵到個好歸宿Deep Silver發行，趕得及今年上半年上市，兼改名做《Metro：Last Light》。
唔換吸毒棉會毒死
出版過程有阻滯，但開發方面就一絲不苟。上集《Metro 2033》外國權威遊戲網都普遍評8至9分，以一間新進而且來自烏克蘭嘅公司嚟講，成績實在亮麗。4A Games技術總監受訪問時曾經講過Wii U效能唔係太掂，否定咗新一集遊戲會同時推出Wii U版本嘅傳言。結合真實物理設定下，遊戲中核戰過後滿目瘡痍嘅地面，以及幽暗曲折嘅莫斯科地鐵站等場景，所營造嘅光影效果都好有水準。主角Artyom仍然要戴住防毒面具喺滿布毒煙嘅莫斯科行動，但要記住，遊戲設定做得好真實，如果唔能夠喺吸毒棉用盡前更換，就會窒息而死。
花招唔多靠氣氛取勝
遊戲場景並唔止得地鐵站嘅地底環境，主角都要走上地面同異種生物對戰，不過地面掩護物少過地底好多，玩落又同地底戰風味幾唔同。雖然話係第一身射擊遊戲，但所能用到嘅動作元素並唔限於用手工改造嘅武器同跳躍，埋身戰時亦可以赤手空拳、用刀或者拎硬物攻擊對手。因為遊戲世界資源有限，避得過的話都唔好浪費得太多彈藥。《Metro：Last Light》嘅花招確實唔多，但遊戲氣氛真係值得一讚，異國荒廢場景加上絕望感覺，都跟其他打到天昏地暗嘅美式射擊遊戲好唔同Feel。
SPEC
類型：第一身射擊
開發：4A Games
平台：Xbox 360、PS3
推出日期：5月17日
售價：$320（Xbox 360）、$360（PS3）
查詢：2359 7998
