EX三一G試辦搶先報
訂購價：$2,780/個（推出日期待定）
正所謂「官圖無限美」，筆者向來寫玩具稿，都要掂過實物、玩過扭過先敢落筆。話說之前喺日本Wonder Festival及宮澤玩具展巡迴亮相過嘅EX合金《三一萬能俠G》，試辦早前短暫抵港，筆者有幸獲邀獨家試玩，發覺新品延續EX合金系列嘅健碩線條及金屬塗裝，企定定齋擺已經型到痹，玩落更覺得「生化」效果拿捏準確，唔會過晒火位，保留到動畫風格，仲有充滿機械感嘅油壓連動、揭開胸甲呈現Getter爐等細節設計都見出心思，就算每個標價高達$2,780，識貨嘅玩具迷都會認同值回票價。
EX合金Robot師WORKS《三一萬能俠G》
訂購價：$2,780/個（推出日期待定）
三款Getter Robot都有細緻嘅生化面罩造型，亦可揭開胸甲呈現Getter爐。
EX三一系列獨有嘅合體顯示核心設計，今次「三一G」嘅字眼就由數目字改成天、地、海。
Dragon戰機形態
如果三款機體一齊預訂，送你Getter Dragon嘅原創武器，包括斧頭造型嘅手槍連機關炮，連同專用嘅持槍造型手掌。
除咗彈頭，爪子中央亦可換裝鎖鏈，又有磁鐵連結防止鬆脫。
Getter Liger戰機形態
每根爪子尖端都裝咗磁石，方便固定造型，張開時可加裝飛彈彈頭。
整塊胸甲向上揭起，就會見到銀色扇葉，原裝機設就係靠佢製造龍捲風。
Getter Poseidon戰機形態
打開胸甲外側，就會見到內藏嘅飛彈匣。
Getter Dragon 揭甲現心
造型魁梧嘅一號機Getter Dragon，簡潔機身備有豐富活動關節，尤其是上半身，肩甲及膊頭都有獨立關節，防止上臂扭動會頂住肩甲，雙手又可以做到握物前傾。背部推進器就可拆走，換成Getter Wing，機翼又可以三節展開，武器就有一對招牌斧頭。另外，三款機體嘅金屬塗裝採用焗漆炮製，質感實淨又富光澤，飛機底部及背部作為合體顯示嘅圓形核心，就從前者嘅數目字改為「天、地、海」，Getter爐嘅展示模式就由拆走胸甲變為揭開胸甲，造工更見細緻。
Getter Liger 穩陣磁石爪
至於二號機Getter Liger嘅武器組件，就比Getter Dragon豐富得多，基本裝備已經有左爪、右鑽，鑽頭又可以換成握物拳頭，左手為咗準確做到長爪嘅收納形態，於是每根爪子嘅尖端都裝咗磁石，能夠牢牢閉合，爪子中央又加入用磁鐵連結嘅飛彈彈頭，或者換成鎖鏈，比傳統嘅插樁式榫位穩陣得多。
Getter Poseidon 旋轉扇葉
筆者覺得三號機Getter Poseidon嘅造工最有驚喜，皆因胸甲外側打得開，Show到內藏嘅飛彈匣；將整塊胸甲向上揭開，又可見到識得轉嘅銀色扇葉，就連胸甲內籠都有分件設計，細緻得嚟大Sell重裝甲風格。腳掌部分同樣出色，可以換成履帶車輪狀態，腳面嘅油壓又能夠隨住前後屈曲而上下連動，大尺寸嘅拳頭就更具霸氣，使出絕招「大雪山」分外傳神。
(c)GO NAGAI．KEN ISHIKAWA/DYNAMIC PLANNING
查詢：2390 9843（Action Toys II）
