球迷必裝NBA League Pass

雖然香港地有唔少NBA球迷，但免費電視台卻從來唔重視，以前情況較好，起碼一星期會播一兩場波，遇到明星賽或季後賽更會有賽事直播。然而，今年真係差到貼地，以上賽事通通冇得播。為咗止癮，小記呢個窮鬼決定畀錢睇波，點知經過一輪資料搜集，方發覺「現在台」收費貴得來仲要播放場數少，真係搵鬼睇！幸好呢個時候得到HK-Kicks版主H先生介紹，原來網上「League Pass」咁鬼正，不但US$49.99就可睇齊全部季後賽賽事，仲支援手機串流及一開四賽事直播，最正係可以聽番當地旁述，唔使再聽本地旁述員廢噏，現場感返晒嚟！