拍住Q3清水灣家樂遊

拍住Q3　清水灣家樂遊

聽日就係母親節，有冇諗過點慶祝？又係飲茶或High Tea，悶咗啲喎，不如齊齊到郊外Refresh、全家人充充電啦！筆者就推薦西貢清水灣半島一帶，有郊野公園之餘，又有沙灘及無敵海景，加埋布袋澳嘅小漁村，過嚟遊車河兼郊遊就最好不過，如果拍住實用又易揸嘅奧迪（Audi）Q3 2.0 TFSI就更加爽！

拍住Q3　清水灣家樂遊

興之所至，全家齊齊到相思灣一遊，吹吹海風確醒神。

出名海鮮正嘅布袋澳，一場嚟到點可以錯過！

除咗飽口福，布袋澳村內嘅洪聖古廟，係當地嘅名勝之一。

布袋澳村入口附近，設有泊車錶位，不過錶位數目唔算多，有泊趁早。

由將軍澳出發，沿清水灣道往西貢方向，就可駛至相思灣。

Q3 2.0 TFSI集操控易及高實用性等優點於一身，新牌人士都易於上手。

以同級標準嚟講，Q3嘅天窗面積實在傲視同儕。

尾箱標準容量為460L，足以應付Family Day遊車河嘅載物量需要。

相思灣係清水灣半島嘅其中一個小沙灘，雖然環境清幽，但位置隔涉，冇公共交通工具直達，莫講話平日，假日人影都唔多，最啱唔想同人逼、靜靜哋吹吹風兼欣賞無敵海景。揸車去嘅話，沿住清水灣道，駛入大坳門路迴旋處前就係相思灣路嘅路口，轉入後沿路直駛到盡頭就係沙灘，沙灘旁邊嘅空地可供泊車。遊完小沙灘，可以揸車沿大坳門路往布袋澳村閒遊，甚至大擦一餐海鮮至返歸，村內洪聖宮前嘅廣場，攤晒村民晾曬嘅昆布、海草及花膠等，充滿漁村風情。布袋澳村入口旁，都設有錶位停車場，但泊位有限，駕駛一族要留意。

安全十足　媽咪盡興

今次作伴嘅Q3 2.0 TFSI，雖則係入門級SUV，不過馬力及扭力分別去到170hp及28.6kgm，配合七前速 S tronic雙離合器自動波，就算車重唔算輕，去到1,510 kg，0-100km/h都只係7.8秒，滿載之下於多彎又多斜路嘅新清水灣道疾駛，力量依然豐盈又唔粗野，力量輸出傾向線性，新牌人士都好易Handle。而且高速下車廂依然保持寧靜，懸掛嘅濾震以及車廂隔音都相當出色，加上廠方最強嘅quattro四驅系統，就算輪胎出現打滑，或者車身偏離軌迹，系統都會即時介入，將動力平均分配到前、後軸，令行車回復循迹性，有車牌嘅媽咪，偶爾想試試身手嘅話，都可以放心畀佢過足癮。

大車廂　個個Like

對SUV嚟講，實用性好重要，4,385×1,831×1,608mm嘅車身長、闊、高，加埋2,603mm軸距，車廂空間自然可觀，尤其後座布局，三人同坐都唔覺逼狹，而且尾箱嘅標準空間已有460L，收起後排就可擴充至1,365L，無論一家人遊車河，或者平日Shopping都應付周到。另一方面，車廂布局井井有條，中控台嘅風速與溫度鍵分開擺位，頂層又有清晰屏幕，至於大面積天窗就帶來愜意嘅開揚效果，相信闔府老少都會個個Like。