《Resident Evil：Revelations Unveiled Edition》性感美女高清戰喪屍

《Resident Evil：Revelations Unveiled Edition》

呢幾年Capcom接連將《Resident Evil》（即係《Biohazard》）多個舊版本高清化，今次就輪到推出只有年半嘅《Resident Evil：Revelations》，真係愈出愈快！當然，之前個版本只係喺N3DS推出，解像度極低，有大條道理升級做高清。新版本畫面靚咗唔在講，仲追加新模式，而本來過場嘅性感茄喱啡Rachel仲可以擔正做突擊模式嘅角色，搵錢得嚟都算有啲誠意！

《Resident Evil：Revelations Unveiled Edition》

女角Rachel於高清版中上位，衣着肯定應記一功。

新增煉獄模式，原本無喪屍嘅地方變成有，有的話就會更多，超難打！

掃描器變得更高性能，睇得見隱藏在場景入面嘅道具同怪物能力等資料。

今集喺營造驚慄氣氛方面確實唔錯，一步一驚心。

呢隻就係新怪物Wall Blister，外形都幾猙獰。

突擊模式另一新角色Hunk由頭包到落腳，無人講佢都可以理解嘅。

突擊模式入面，可靠儲經驗值強化能力，亦可過版後獲得新武器。

高清家用版
高清版無論背景貨架同怪物爛身爛勢嘅造型，都明顯靚過N3DS版好多。

N3DS

「膠鴨女」Ar Yu真人Cosplay Rachel都幾神似，係差在無長髮披面而已。

畫面大幅優化

當年N3DS版賣點係「回歸原點」，以視覺盲點同突如其來嘅喪屍營造恐怖氣氛，不過N3DS畫面只得420×240，睇唔清楚背景同喪屍嘅恐怖樣。到「Unveiled Edition」家用版，畫面解像度就大幅提升到1,280×720，好似怪物嘅皮膚、肌肉紋理都細緻好多，睇落都猙獰啲，十分駭人；光源表現亦見細緻，甚至連原版因解像度低而睇得唔清楚嘅Chris背包嗰把刀，喺高清版上都睇得到。不過講真一句，無論係《Unveiled Edition》高清版或者係原版都好，故事情節基本上係一樣，都係話對付生化危機恐怖分子部隊「BSAA」未成立之前，女主角Jill Valentine為咗尋找失咗蹤嘅同伴Chris而展開一連串搜索救援行動。

突擊模式新改動

戰役模式嘅改變着實唔大，特別在加入「煉獄」難度，即係普通難度冇喪屍出現嘅地方會變成有，原本有嘅就會出現更加多，有心挑戰「喪屍煉獄」嘅玩家應可過足癮！主線戰役模式舞台設於海上漂流嘅郵輪，喺隔絕嘅封閉空間冒險。至於變得最多嘅係突擊模式，講求動作戰鬥過關，新版本改動方面，包括有提供儲經驗值強化能力的玩法，過版後仲會得到新武器，亦可以控制兩位新角色。