Xperia L 強攝

$2,498

用手機Snap完即Share漸漸成為主流，唔少旗艦手機嘅攝影功能仲誇啦啦；可惜一去到價位稍平嘅入門平機，成像仍然鬆郁矇。Sony最近推出嘅Xperia L，睇佢$ 2,500機價就知主打入門用家；勢估唔到竟然備有800萬像素鏡頭，仲要支援埋招牌Exmor RS for mobile影像處理器，高低反差難佢唔到，隨時影到靚相，絕不失禮。

$2,498

800萬像素後置鏡頭襯上銀圈裝飾，相當有型。

電池容量只有1,750mAh，好在有個幫你慳電嘅Stamina模式，可以限制熄芒時開啟嘅程式。

機面四邊都係斜面，設計都幾特別。

記憶卡要拆電先換到，唔太方便。

機底加入提示LED燈，個人覺得不太夠光。

流線型弧形機背，手感都唔錯。

預載Android 4.1系統及自家介面，有大量主題同Widgets畀你用。

內置《OfficeSuite 7》，隨時隨地睇文件檔都冇問題。

試相
室內低光環拍攝，雜訊控制不俗。

近攝模型車仔，對焦快而準，色調亦相當自然。

高階攝力

作為日系廠商的龍頭代表，Sony向來重視手機攝影功能，今次Xperia L亦不例外，備有800萬像素自動對焦鏡頭，睇鏡頭規格可能唔夠同廠旗艦機Xperia Z咁高，不過就同樣採用Exmor RS for mobile影像處理器，可以提高感光度，仲有效減少雜訊，影夜景相都零舍靚啦！另外，此機除咗支援HDR相片，仲追加HDR影片，方便於高低反差大嘅場景錄影；加上備有邊拍片、邊影相嘅「攝錄同步」功能，拍短片都掂。

特色斜邊

論外形Xperia L亦唔輸蝕，一如舊型號Xperia V、Xperia J般採用弧底設計，機背頂及底部向中間斜落，流線型非常好睇，四邊亦呈斜面，確實幾好揸手。機身就連細節位都做足，好似機側沿邊嘅銀線、機背鏡頭位置嘅金屬環以及金屬電源鍵，比唔少高階機設計仲要細緻，有驚喜。唯一可惜係屏幕雖然有4.3吋，不過解像度只有854×480，亦都冇Mobile BRAVIA Engine技術加持，顯示畫面唔算好Sharp，少少扣分。

一拍配對

同場Sony仲推出一系列藍芽喇叭、耳機等配件，想同手機玩快速配對，咁就一定要有NFC。Xperia L特別內置NFC技術，配合廠商嘅「One-touch」功能，用機背同對應嘅配件拍一拍就會成功配對，唔使進入藍芽設定慢慢設定，爽手得多。要留意嘅仲有規格，搭載1GHz雙核心處理器及1GB RAM，試玩時覺得操作流暢，就算同時開啟五、六個Apps，不斷切換玩Multi-tasking都冇窒機，合乎水準。