本地名模Carrie Chiu自3年前誕下可愛囝囝Marcus後，專心照顧囝囝，同時亦開始轉型，近年漸漸參與更多兒童工作，仲開班授徒培訓小模特兒。之前有教開大人同年輕人做模特兒的Carrie，發現教小朋友非常好玩，最大滿足感就是加強小朋友的自信心。

Carrie表示：「剛開始跟Beat Academy合作開設小朋友模特兒班，每個星期日上課一次，反應不俗。其實這課程所學的東西不只限於做模特兒咁簡單，因為小朋友不時要在學校內上台表演，此課程可以增加小朋友的自信心，令他們習慣上台及面對鏡頭，最開心是見到不少小朋友最初上堂都好怕醜，乜都唔敢做，只係匿埋喺媽咪後面，但一兩堂之後就大膽咗，平時唔敢表演或擺Pose，一上堂或一上台就即刻做到。」

不過Carrie的工作計劃不止於此，自言愛忙碌的她今年已滿肚大計，並希望一一實現和進行。「我個人好鍾意忙，唔停得落嚟，我好享受湊仔，但同時希望擁有自己事業，希望兩邊可同時進行，亦好多謝媽咪和屋企人的幫忙。今年除了做小模特兒導師工作外，我亦會跟本地珠寶品牌Crossover設計首飾，希望6月時能推出。另外，之前曾跟一時裝品牌傾過Crossover推出童裝系列，雖然最後合作唔成，但我已完成好多設計草圖，現在正找尋其他合作機會，希望令我的童裝系列可以順利推出。其實我之前都幫Roadshow做過主持，覺得好好玩、好有挑戰性，稍後亦想嘗試更多主持工作。」這位潮媽果然百足咁多爪，期待她的設計早日面世。

趙嘉懿 Carrie Chiu

十多歲開始擔任模特兒，曾參與多個時裝品牌的花生騷、廣告及MV等，現除擔任模特兒外，還參與主持工作及開班教授年輕人及小朋友，分享擔任模特兒的心得。