聯絡人備份好幫手《My Contacts Backup》
近來唔少人都話個Contact List失驚無神冇咗，其實大家應該要定期為Contact List備份，做個保險。咁各位就不妨試試《My Contacts Backup》，打開App後按下「Backup」就會記低手機的聯絡人資料，完成後再按下「Email」即可以將剛才記錄的vcf檔案傳送到指定電郵，有需要時打開個檔案就可以拎番晒所有Contact List，簡單又易用。
介面簡潔，按下Backup即可將手機內的Contact List備份。
平台：iOS、Android 費用：免費
重力黑球四圍碌《Gravity Maze》
此App屬於重力遊戲，以操控為主，亦需要動少少腦筋。玩家需要擺動手機，以手機內置的陀螺儀控制小黑球移動，並在指定時間內將小黑球碌到去目的地。當中最困難係小黑球不止一粒，所以好多時移動的位置未必一致，有時候甚至會卡住喺死位！雖然遊戲以獨特的畫風及操控性為賣點，惟畫面係全黑白，無半點色彩，要扣分。
平台：iOS、Android
費用：$8（iOS）、免費（Android）
化身英雄 《Iron Man 3》
近日熱爆的話題必定係剛上畫的《Iron Man 3》（鐵甲奇俠3），主角Tony Stark既有錢又打得，絕對係男人中的XO。想學佢咁有錢就幫你唔到，但如果你想扮演Iron Man在天空飛翔和殺敵，咁就一定要玩由電影官方授權的遊戲App《Iron Man 3》。遊戲中玩家主理Stark工業開發部，需要披上戰衣對抗世界各地A.I.M.勢力，並在各個環境中避開障礙物和迎擊敵人，需要高度專注力和靈敏的反應，玩到某個程度仲有Boss出來挑戰你，而且全部都是漫畫中的經典敵人，包括Crimson Dynamo、Ezekiel Stane、Living Laser及M.O.D.O.K，都唔易應付。
遊戲最正是有齊電影中出現過的18件Iron Man裝甲，由Mark III到Mark 42都有，玩家仲可以為裝甲升級和維修，而升級的主要項目包括基本武器、特殊攻擊及生命值，讓你改裝完成後上陣殺敵。此外，遊戲的3D畫面上乘，角色設定跟足原著，加上玩落完全唔覺窒，穿上裝甲高速移動夠晒爽，重點是呢隻大作竟然完全免費，實在值得一試。
平台：iOS、Android 費用：免費
新鮮動畫免費睇《bilibili》
假如你係動漫迷，又想睇新鮮滾熱辣的動畫，被動漫迷俗稱為「B站」的bilibili絕對可以滿足到你，佢唔單止擁有自己的官方網站，仲推出App益街坊，程式收錄了日本最新最快的動漫、音樂、娛樂等，而所有動漫影片都配有中文字幕，最重要係影片非常流暢。不過App內的彈幕功能（即別人的留言）會在睇片時布滿畫面洗版，雖然該功能無法關閉，但只要在設置中將彈幕的透明度設定成0%就唔會睇到任何留言。
平台：iOS、Android 費用：免費
百層密室逃脫《100 Floors Escape》
屬虛擬版密室逃脫，雖然冇真人版咁刺激，但一樣玩上癮。顧名思義遊戲要玩100層先爆到機，玩家要用盡一切方法解鎖，又拖、又搖、以及橫掃、傾斜，仲要用四圍的物件輔助，總之唔好放過任何可能性。雖然畫面唔算十分出色，但配合聲效也相當有現場感。頭幾關大家玩落覺得毫無難度可言，不過玩到四五十關左右就會叫苦連天，想測試自己的解謎能力有幾高，玩過你就知！
平台：Android 費用：免費
一分鐘KO辦公室《Smash the Office》
打工仔做足九粒鐘，仲要受客人、上司氣，而且無從發洩，唔知大家有冇諗過打爆部電腦、掃低所有文件，甚至反轉成間辦公室？雖然現實生活中唔容許大家咁做，不過就有《Smash the Office》讓大家盡情宣洩情緒。遊戲中大家係一名白領，在限時一分鐘之內可任意摧毀成間辦公室，透過連續打擊以獲取道具和金幣換武器，入面有齊電腦、飲水機、Foamboard等畀大家打爆，設備相當齊全。先旨聲明，遊戲入面你想點發洩都得，但返到公司千祈唔好亂嚟！
平台：iOS 費用：免費
