《Injustice：Gods Among Us》

Marvel有「復仇者聯盟」，其實DC漫畫都有個「正義聯盟」（Justice League），核心成員有超人、蝙蝠俠、神奇女俠等，今次開發《Mortal Kombat》（真人快打）的NetherRealm Studios就將「正義聯盟」英雄之間的鬥爭帶到遊戲界，炮製出《Injustice：Gods Among Us》，廿幾三十位DC英雄除可用盡招牌功夫痛擊對手外，更可用極具互動功能的場景「陰」人！此作平衡度高，內容豐富，可以講得上係近期淡靜Game壇中必玩之作！

《Injustice：Gods Among Us》

小丑實戰能力就無乜，靠陰濕招取勝。

場景設計一絲不苟，而且更有好多互動功能。

可以擸起破壞場景後的道具從後攻擊，呢招都幾毒。

神奇女俠嘅功夫都比較硬橋硬馬，無咁多特異功能。

一場內訌都係因超人而起，你睇佢爆Seed個樣都幾得人驚。

真人快打上身

「正義聯盟」早在60年代初已在漫畫出現，不過未撈過界拍成電影，知名度無Marvel「復仇者聯盟」咁高。《Injustice：Gods Among Us》內容係話超人至愛被殺，因而訴諸武力，結果有啲DC英雄撐超人，另外奸奸地嘅蝙蝠俠就同另一批英雄人物組成一黨對抗，一眾DC英雄內訌。遊戲設計係由《Mortal Kombat》（真人快打）團隊負責，要知道呢款遊戲於外國格鬥Game壇好有名；今次並非純粹將角色做得靚靚仔仔就算數，反而每個角色的招式、場景設計以至遊戲的平衡性都做得一絲不苟，唔少玩家玩過都讚呢隻遊戲仲好過《Mortal Kombat》添！

小丑陰濕招出擊

人物多、角色設計又吸引，但唔係每個英雄都好似超人咁有神力，好似小丑呢種陰陰濕濕的角色又點夠打？咁又唔使擔心，設計遊戲時已經諗過度過，務求令每個角色盡量平衡，好似小丑就多用旁門左道功夫，至於蝙蝠俠則傾向使用道具，閃電俠就係靠快招致勝，神奇女俠會用長劍、盾牌、長鞭等武器，各有專長。角色出「超必」時場面誇得，超人會一拳將對方打出大氣層，再跟住施以重擊；閃電俠亦會用光速圍繞地球一圈再出致命一擊！

互動場景玩法多

抵讚嘅仲有場景設計，《Injustice：Gods Among Us》角色出招又狠又猛，打穿牆甚至打爆背景都輕而易舉，最基本可以隨手拎起破爛物件攻擊，甚至可以執從場景跌落嚟嘅道具如手榴彈炸對手，最誇係用場景上的高壓電線電對手，招式層出不窮。打打下無端端更會畀背景架火車轆過，甚至畀企鵝人、雙面人打一身，都唔知好嬲定好笑。而玩開格鬥Game不時被逼埋牆角，不過呢隻遊戲嘅牆角位有時會有紅色按鈕，可以憑此觸動機關，例如射出導彈反攻對方，邊個英雄最後仍然可以企得响舞台？要打到最後先知！遊戲仲支援八人網上連線，應有元素全部有齊，算抵玩啦！

INFO

類型：格鬥

開發：NetherRealm Studios

平台：PS3、Xbox 360

推出日期：已推出

售價：$380

查詢：2359 7998