大埔道驚魂!!

好緊張！小編乃第一次有幸可以同大家來個「些呀零」（雖然大家可能見過我上鏡），作為頭炮當然要攞啲勁嘢出嚟分享一吓。話說早排網上熱播短片：加士居道出現疑似紅衣女鬼，相信大家都聽過甚至睇過，片中的紅衣主角好似呈現半透明狀態，夜晚一個人睇都咪話唔驚，所以潮流組員中，有人唔敢睇要返公司搵人壯膽先敢瞄兩眼。但講開「鬼形鬼相」，難以同小編一次親身經歷相提並論！幾日前一個月黑風高的晚上，放工之際攰到頭暈暈，一心極速返歸倒頭大睡。上車時明明是包車狀態，誰知當小巴上到大埔道的時候赫然發現有一張面無血色、骨瘦如柴的少女躺在我斜後方的雙人座位之上，仲要兩眼發光直望住我……正當我諗極都諗唔起《般若波羅蜜多心經》應該點唸嘅時候，司機大哥竟然抽頭入油站下車而去，而那「物體」更有移動迹象，嚇得我幾乎奪門逃走！當我鼓起勇氣回頭一望，發現佢起身行去最後面座位再瞓過，先知佢係迷幻少女而唔係飄「靈」燕，咁都冇咁驚。但故事教訓，下次都係唔好亂咁望，自己嚇自己可能仲驚！

Edwin Editor

過億藍寶石

成日做高級珠寶Feature見過好多各式大小珠寶首飾，價值數十萬、過百萬已是等閒事，間中在一些High Jewelry的Shooting同Event都會見到過千萬甚至四、五千萬的珍品，但過億元珠寶同寶石就真係從未見過。

最近在Cartier的High Jewelry Event入面，我終於打破個人紀錄，近距離欣賞到價值連城、高達17億元的藍寶石。呢顆藍寶石屬非常稀有的Kashmir Sapphire，重量約42卡，成為當日全場焦點。我不是寶石專家，但個人亦覺得這顆藍寶石色澤非常特別且非常Clear。唔知有邊位富豪或有心人，會用一間山頂豪宅價錢去買下這顆藍寶石呢？

Sanna Senior Reporter

七毫子的活性乳酸菌

事先聲明，小記並非在賣置入式廣告，而是早前趁復活節出走了韓國一趟，那裏的韓國美食令我回味和懷念！（好啦，我承認高大帥氣的韓仔也是其中之一……）多得朋友帶路，小記吃遍年糕、辣雞、十二分的烤肉、生八爪魚、「阿珠媽」超用心整的早餐、草莓牛奶、香蕉奶……

但係，最最最令我驚艷的絕對是這個，在便利店無意發現的「韓版益X多」，價錢先令我震驚，100Won一支，等同港幣七毫子，多得同胞們的搶購，港版愈搶愈貴，相對這個飲品，價錢史無前例咁平，而且味道不會太甜，入口順滑，本想大手大手入貨，可惜旅程多日來，並非間間便利店有售，現在只可以「睹相憶味」了。

Yilam Reporter

古着矜貴

作為記者，好多時候可以比其他人早一步率先接觸或見識一些稀有珍品，眼界大開之餘，也享受到這種寓工作於娛樂的滿足感。好似早前應連卡佛邀請去佢哋位於IFC開設的BLITZ新店開幕，欣賞到最新Vintage Voyage系列，品牌今次隆重其事，專誠邀請了分別對CHANEL、Hermès和Rolex設計瞭如指掌的專家講解唔同年代的設計特色和用料，仲教你從用料來鑒別袋和錶的製造年份，令本身對Vintage古着非常鍾愛的我獲益良多。

另一得益，就是可近距離接觸到Model身上「高度戒備」的Vintage手袋和飾物，手工精緻卻保存得很新淨的CHANEL Vintage Bag；加埋靚女Model的古典髮型妝容、Vintage Dress，以及一條重分量的Vintage頸鏈，於我而言，等同欣賞珍貴古董一樣，齋睇買唔起同樣樂在其中！喜歡Vintage的女生不妨去睇睇佢哋嘅新系列！

Ki Ki Reporter