Samsung 85吋UHD TV 好玩功能 抵畀Like

年頭Samsung喺CES已經展示過一部大到110吋嘅UHD TV S9，不過現貨率先到港嘅卻係一部「細少少」嘅85吋4K型號S9，但其實已是目前市場上正式投產嘅最大UHD TV，贏咗其餘兩家廠商1吋咁多！講機身設計同特別功能，S9都真係幾正，畫架式支撐架別樹一幟，仲可以享用強化咗嘅聲音操控同埋動作操控功能，竪起拇指就可用S9喺Facebook畀Like，好玩！

首玩4K畫面細緻實淨

呢部S9能夠顯示到4K解像度，畫面表現當然仔細過全高清，而且更用上Samsung Precision Black Pro技術，可顯示更實嘅黑色同更純嘅白色，亦可通過極致光暗調校術提升對比層次，畫面質素都算頂級。不過現時最大問題係4K內容真係少，除咗廠方自己嘅試片之外，都幾難搵到4K內容嚟表現UHD TV嘅顯示威力，惟有以全高清再經倍線處理變4K睇住先。至於4K廣播制式雖然現時十畫都未有一撇，但係S9就預留咗升級空間，只要廣播制式一制訂就即時可更新升級支援，唔怕將來無得睇。至於S9嘅機身設計都好吸引，用上名為Timeless Gallery外形，望落去似一件藝術品同大型畫架多過似部電視機。　

直豎拇指FB畀Like

今次Samsung將S9稱為UHD SMART TV，當中「SMART」一字就代表S9可以玩到Samsung自家嘅智能功能。今年智能功能全面升級，例如聲音操控功能，只要對住電視用廣東話講「音量十五」就可將音量調至15級，直接講出頻道號碼亦能夠迅速轉台，不過事前仍似之前咁要講「Hi TV」先能進入語音模式。至於動作操控升級幅度就更大，上年版本都係用單手左掃右掃揀選項，到今年嘅新SMART TV就可用雙手操作，握實雙拳即可放大及旋轉相片，而最特別係用上Smart Hub內社交「Social」選項嘅Facebook時，喺電視前豎起手指公就可以畀Like，簡單好玩！

Smart Hub多嘢玩

S9跟其他新一代SMART TV都能內置新Smart Hub功能，當中會分成社交「Social」、「Photo, Video & Music」同「Apps」三個主項；「Social」會有Facebook外，亦有Twitter、YouTube等社交網站，而「Apps」入面既可下載Apps外，今次再獨家推出《Clickplay》App，隨時可於SMART TV內點播荷里活全高清電影或益智兒童節目。除了畫面同智能內容之餘，唔少得就係優質嘅音響系統，S9已內置2.2聲道揚聲器，當中包括左、中、右三路及雙重重低音揚聲器，總輸出達到120W咁誇張，成千呎客廳都好夠聲！

F8000及F7500系列 SMART TV新成員

要用到新Smart Hub同新聲音跟動作操控，其實唔止UHD TV S9有得玩，另外兩款新SMART TV F8000同F7500都同樣有齊以上功能，亦一樣內置四核心處理器，幼邊框設計都好型。F8000用上新月弧形底座，規格會強少少，對應1,000格流暢位增技術，而所提供的尺寸亦較大，分別有55吋、65吋及75吋三款。F7500尺寸較小，分別有40吋、46吋及55吋三款，行800格流暢倍增技術，顯示高速畫面時亦好穩定。兩款新機都附上Smart Touch智能遙控，可以對住個遙控講嘢，兼可捽中間個TouchPad落指令。

去年機款都有得升級

今年SMART TV咁多新嘢玩，早前先至買咗2012年型號嘅用家咪好蝕？其實只要係2012年推出嘅SMART TV ES9000、ES8000同ES7000嘅機主，都可以於嚟緊六月買個智能升級組件SEK-1000插入電視機背個擴展槽，升級玩到新聲音操控、動作操控等，而且更會由原來雙核處理器升到四核，呢個亦係上年時所宣傳嘅「Smart Evolution」特點。如果定價唔太貴的話，都幾值得入手！

查詢：3698 4698