旅行幫到手

筆者本身有部Nikon入門單反，作為出Trip公幹拍攝之用，但若果連去旅行Snapshot都要鏡頭、閃燈、Body一袋二袋出發，咁就太過笨重喇！筆者最近就睇中Fujifilm新款Prosumer機仔X20，貪佢可以模擬舊式菲林相片成像質素，仲可以玩埋自己最Like嘅移軸及疊相效果添！加上對焦爽快、影微距又靈敏精準，同事之間已好評如潮。而且銀黑懷舊機身夠晒型仔，售價$4,880亦不算昂貴，筆者深怕心水銀色無貨，故此不假思索即去電器店入手！大滿足！

Alfred Reporter

真人劍心刀刀見血、招招攞命？

如果你是日本漫畫迷，對《浪客劍心》應該不感陌生，1994年開始連載，單行本賣出超過五千萬本；最近真人電影版剛推出藍光碟，作為劍心Fans的小記，當然要買來睇睇。主角劍心由佐藤健飾演，睇過日劇《龍馬傳》的觀眾應該認得他，雖然外形有點稚氣，但演劍心亦算入型入格。跟原著最不似的選角無疑是蒼井優，高荷惠本是冷峻系美女，蒼井優卻略嫌太稚氣可愛，最有驚喜的反而是飾演刃衞的吉川晃司，如追開八十年代日本偶像的朋友，應該聽過吉川的大名，張國榮的名曲《Monica》就是改編自此君。真人版拍得算不錯，亦沒破壞原著的風格味道，不過最令人百思不得其解的是，碟面標語寫着：「刀刀見血、招招攞命」，但故事明明講劍心在幕末後立誓不再殺人，又何來刀刀見血、招招攞命呢？

Angus Reporter

「姣」色隨身袋

小記出街不嬲鍾意輕便，銀包、鎖匙、電話都會放晒入褲袋，幾乎從不帶袋，不過近期入手了一批Slim Cut洗水褲，呢堆隨身物品放入褲袋會變得好腫脹，而且亦着得唔舒服，迫於無奈惟有入手隨身袋。為了能夠一物二用，小記最終揀咗Hellolulu Jelly Bean相機袋，就算唔擺隨身物品都可以放DC仔，再加上紫撞粉紅的「姣」色，其實拎出街都幾靚o架，盛惠幾舊水，雖然唔算好平，但勝在用途多多。

Jason Reporter

Micro-Guide Mount攝星一闊三大

為了攝星，小記之前已買了個俗稱「較剪」的導星儀，盛惠幾千蚊。而攝星裝備仲有大把嘢要買，真係一闊三大，其中一樣必須要有的，正是Micro-Guide Mount。普通貨色配合「較剪」使用，裝落三腳架的波頭都已經用得，不過對極就甚為麻煩，因為好易移位。相反圖中這款Micro-Guide Mount，勝在可逐少移動，精準對極，少麻煩、慳時間。正因如此，索價就要成一千五百大元，幾肉痛，不過攝星要緊，花這些錢也是值得的。

Michael Reporter

破抵價LVC

唔少時裝大師都話過牛仔褲係歷史久不衰嘅衣着Items，小記都認同牛仔褲既易襯又舒服，所以點都有番幾條傍身！小記一向都鍾情Levi's Vintage Clothing（LVC）嘅老牛，早期就貪佢日製造功靚，Cutting又啱亞洲人，所以常喺日本Outlet半價入手；不過近年LVC就變成歐製，品質硬係覺得唔夠日製好，但勝在貨量多，網購又成日大劈價。今次就喺英國網站執到寶，免運費、八折Promotion Code之下，一條超經典嘅One Wash 66501只不過$500鬆啲，仲平過買普通版。連埋呢條新歡以及幾個月前入手嘅67505，已經集合咗洗水、原色LVC三寶，相信短時間都唔使再買老牛喇！

Vincent Reporter