55、65吋4K BRAVIA 靚畫入屋

84吋4K UHD TV無疑好架勢，但香港唔係太多家居環境擺得落，反觀Sony即將推出嘅兩款「細尺寸」55吋同65吋BRAVIA X9000系列UHD TV就實際得多，除咗價錢可望平到幾萬蚊有交易外，觀賞距離亦進一步縮短。加上兩款BRAVIA X9000 4K電視仲配備2013年度新TRILUMINOS Display LED背光技術，顯示紅、藍及綠色時更豐富自然，可以睇埋以前被忽略咗嘅微妙色彩變化。

TRILUMINOS技術色域更廣

早在一月時Sony就推出咗84吋4K UHD TV，今次呢兩部細尺寸55吋及65吋BRAVIA X9000 UHD TV屬第二波出擊。正如引言提及，84吋電視真係未必個個屋企擺得落，65吋或者55吋型號就似乎較符合香港家庭實際需要，而且由於4K UHD TV嘅觀賞距離可以比同尺寸Full HD TV近一半，即係話55吋BRAVIA X9000嘅觀賞距離可近至1.1米，擺位方面應該方便好多。今趟兩款新UHD TV既搭載4K X-Reality PRO影像處理引擎提升畫面質素之外，更引入能顯示出廣闊色域嘅TRILUMINOS Display LED背光技術，無論係紅、綠、藍色嘅色域都豐富得多，顯示出更具層次嘅顏色變化；睇Sony自家4K試片，有一段影像係擺滿紅色物件嘅紅色房間，每種紅色都層次分明，抵讚。至於3D顯示方面，BRAVIA X9000已經轉用被動式3D顯示技術，可佩戴輕巧嘅3D眼鏡睇立體影像。

新Sense of Quartz設計更省鏡

新一系BRAVIA X9000 UHD TV喺外形設計上都花咗唔少心思，今次採用Sense of Quartz新設計概念，喺產品上加入幾何圖案，如BRAVIA X9000屏幕部分就設計成較闊嘅長方形，一如石英懸浮在圓形金屬底座之上，觀感上都幾醒神。細位設計上都照顧周到，機底招牌下方內藏一盞能發出柔和亮光嘅LED指示燈，開關時會着白燈，當連上流動裝置時會着綠燈，錄影時會轉紅燈，轉Menu時又會變成藍燈及黃燈。大家亦會留意到BRAVIA X9000電視喺屏幕兩旁都隱藏前置式揚聲器，佢用上名為Signal-to-Sound Architecture結構揚聲器技術，仲加入Sony自家磁流揚聲器同數碼訊號處理技術，喺採用2.2聲道設計下，總輸出達65W，其實都好夠聲。

對應NFC一掂手機連電視

至於「特異」功能方面，雖然BRAVIA X9000未玩到體感操控，但跟流動裝置嘅連動就確實做得唔錯。X9000既已支援Wi-Fi連接同提供一系列網上服務，亦新增「One Touch Mirroring」功能，可兼容NFC同埋屏幕鏡射，用Sony Xperia智能手機輕輕一掂背藏NFC功能嘅One Touch遙控器，兩、三秒就可將手機畫面無線投放到4K電視之上，睇片、玩App、打機樣樣都做得到。此外，X9000亦支援透過Wi-Fi手動連接作Screen Mirroring嘅MHL功能，將幾吋畫面嘅手機內容「投射」到幾十吋嘅大電視之上。

SPEC

顯示解像度：3,840×2,160

顯示尺寸：55吋及65吋

影像處理技術：3K X-Reality PRO影像處理引擎、Motionflow XR 800Hz

背光控制技術：分區背光控制技術

3D顯示：被動式

音效：2.2聲道、總輸出65W

HDMI端子：4組

推出日期：7月中

同場加影：不同制式：3D BRAVIA電視

今次新X9000系列UHD TV用上被動式3D顯示設計，但並非代表所有BRAVIA電視都會改用被動式設計，如即將推出新系列全高清BRAVIA電視中，W950系列就配備TRILUMINOS Display技術及極纖薄小巧雙向低音反射音頻揚聲器，就係用主動式設計，而較低階嘅W800系列則係被動式設計。

型格白色：5.1聲道4K家庭影院

留意左上角BRAVIA X9000張相，原來配襯住一套好少見嘅白色家庭影院組合，其實呢套組合同樣係今年新推出、專為4K電影而設嘅4K全高清5.1聲道3D藍光家庭影院組合BDV-N9100WL。佢以白色配合湖水藍設計，4K藍光播放機機身亦用上特別切割面造型，操作時中央部分會亮起藍光，外形創新。家庭影院揚聲器配備Sony自家磁流揚聲器技術，無論係播放人聲、樂器聲以至重低音都好有水準，另新增球賽模式音效，採用大型賽事聲效數據模擬出極強嘅臨場感，如遇到幾位鍾意「亂噏」嘅評述員講波時，更可隨時隱藏佢哋把聲。除白色設計嘅BDV-N9100WL之外，仲有好易襯嘅黑色機款BDV-N9100W，主要分別在於座地揚聲器唔識閃燈。

查詢：2345 2966