顧家Fight Nissan Note DIG-S Green

出車同買樓，其實都幾相似，唔止要抵，仲要間隔好、地方見使，咁先住/坐得舒服嘛！筆者最近就試足日產（Nissan）Note DIG-S Green成個星期，最深印象正正係車廂有估你唔到嘅大空間，唔止坐得爽，尾箱放咗兩個行李篋都仲有位剩，加上車門開啟角度夠闊，老人家上落車都唔使就住就住，處處做到User-Friendly，啱晒我呢種日頭返工、夜晚及假日湊住成頭家嘅婆仔需要。

講明先，筆者出車向來係實用派，為咗頭家、乜都肯捱、亦都肯Fight，大馬力、高速度對我嚟講冇乜吸引力，馬力嘅嘢，夠使就得，最緊要都係車廂布局，可以舒舒服服湊女返學、放學，又或者夠位載晒一家三口加老爺、奶奶Family Day，已經好有吸引力，當然，車價要大眾化啦！起初見到Note DIG-S Green嘅真身，車仔細細，仲以為窄窄哋，坐入去先發覺車廂空間超出預期，受惠於特別設計嘅車架結構，加上設計師分寸必爭嘅偷位技巧，令車廂總長度多達2,065mm，前、後排都有寬敞嘅乘坐空間，後排乘客翹埋對腳坐都仲得。

親民全車設計

坐得舒服之餘，Note仲有好高嘅實用性，事關尾箱容量高達330L，筆者因送機關係，就放咗兩個行李篋，都仲有接近三分一嘅剩餘空間；雖然今次未用得着，但係代理提醒筆者將後排放平嘅話，置物量仲可以倍增，擺放兩、三部BB車都仲得。除此之外，車內又有多個儲物空間，唔止有雙層首飾箱，就連飲品架都有八個，一人一杯凍奶茶都擺唔晒，似乎多咗啲喎。至於上文提及嘅車門開啟角度，睇番規格表，原來正確數值有成85°，老爺、奶奶話上落容易，就連大件頭嘅男同事都話一樣Easy。

實試$0.85/km油費

雖然筆者對馬力要求唔算高，不過都有底線，就係滿載上斜唔可以拉牛上樹，Note DIG-S Green配置咗1.2L高效燃油直噴Supercharger引擎，加埋Miller Cycle高壓縮比技術，有效提升燃燒效率，馬力及扭力就分別去到98ps/5,600rpm及14.5kgm/4,400rpm，貼近1.5L車水平，力量表現令人放心，而且耗油量比1.5L低，事關配合XTRONIC CVT無段變速波箱及ISS智能熄匙系統，廠方嘅綜合耗油量數字係24km/L，以目前的油價計算，油費約$0.7/km，故此出車可享環保稅務優惠，車價$176,800的確有競爭力。

至於今趟嘅七日試車，行咗超過600km，儀錶板嘅耗油量顯示為18.4km/L，計落油費只係$0.9/km左右，$1都唔使，今時今日又有幾多車做得到？

SPEC

車型：五門五座位揭背車

引擎：直三配超級增壓

容積：1,198c.c.

最大馬力：98ps/5,600rpm

最大扭力：14.5kgm/4,400rpm

驅動：前置引擎、前輪驅動

傳動：電子智能無段變速波箱

懸掛：（前）麥花臣 （後）扭力桿

制動：（前）通風碟 （後）制動鼓

售價：$176,800（已扣除環保稅）

查詢：2262 1088（合誠汽車）