真人示範

同人講做潮流版，一般人都會投以艷羨目光，皆因以為成日接觸靚人靚衫，但其實只係啱一半，查實負責Styling的同事背後都有辛酸一面。例如去借衫一抽二袋三大盒四小包，同抬米真係無咩分別；又例如最近天氣異常，日日落雨，想安排Outdoor Shooting，晚晚臨瞓前都要祈禱，上天應該接咗佢哋唔少Call。有時候呢，仲要幫同事客串埋做Fitting Model，試穿上身，睇睇效果如何，Well，你可能會話：做客串模特兒，好玩吖！嗯，難度在於着上身後，要抵受周遭其他組別同事嘅奇異目光，唔係人人頂得到o架！

Amy Editor

告別我

小記在傳媒界度過了五年多奔波勞碌的日子，自覺幸福又幸運。幸福是一路走來都得到身邊同事的照顧，幸運是加入潮流組，飽覽時尚界五光十色的美人美事。只是時光飛逝，年華差不多耗盡，很想為自己的人生多添一些色彩，不得不毅然放下香港所有，出走澳洲。還記得中五畢業時的紀念冊上，自己老作的格言：「體驗生活，享受人生」，努力體驗的過程難免迷失，可是只要知足，就已經是享受，所以，這趟旅程我更想去感受，繁華大都會以外不一樣的人生，告別以前的我，換個Brand New Me！

P.S 多謝同事們在我餞行晚宴上齊齊整整穿上Slogan Tee，特挑這張相，因為影得自己條腿瘦咗30倍，同糖果小姐差不遠矣！

編按：潮流之門常為你打開。保重！

Moe Reporter

A+喪屍

本人向來對血肉橫飛、劇情亂嚟的「B片」、「Cult片」無乜癮，歐美喪屍片嚴格嚟講一套都無睇過，而最有印象又叫得出戲名的就係1998年由李璨琛、陳小春同湯盈盈主演的港產電影《生化壽屍》。早排「面書」上就流傳一套來自澳洲短片電影節TropFest中名為《CARGO》，以「喪屍×親情」為題材的短片，短短七分鐘劇情全無對白，但當中細節位如撕下車尾玻璃媽媽貼紙、吹氣球畀個BB都夠晒「催淚」，而本人認為短片「扭橋」扭得最精警的一幕就是這位快變喪屍的父親，竟然利用拾來的血淋淋內臟作餌並綁起雙手，任由漸無意識的身軀隨着血味引領，將BB帶到安全區，將核突、獸性、智慧、親情融為一體，喪屍片都可以拍到咁溫情，呢套應該要攞奧斯卡獎！

Pasu Reporter

泰國狂買「印度帽」

上月，懷着輕鬆心情，放假出走到泰國一轉，一場來到Hea一Hea，當然要去吃最愛的酸辣冬蔭功湯和Shopping掃貨。四日三夜行程，早已安排到Siam Square和假日翟度翟市場，順道遊覽翟度翟市場鄰近的紀念公園，在湖泊上坐鴨仔船親親大自然。相片中，大家除見到得意鴨仔船之外， 有否留意到我頭上的紅色「印度帽」，是我在Siam Square旁的小攤檔入手，一頂約三、四十港元，由於太喜歡的關係，我一口氣買了數頂回來，今個夏天將會陸續出動！

Candy Reporter