《Injustice: Gods Among Us》DC角色卡牌格鬥

Warner Bros對呢款以DC漫畫人物掛帥嘅新遊戲《Injustice: Gods Among Us》相當有野心，除咗家用版搵《真人快打》開發團隊打造外，仲同期出埋手機版遊戲。不過手機版就唔係玩格鬥，而係改成卡牌遊戲，透過收集卡牌玩三對三對戰。

換成卡牌遊戲，當然唔止得蝙蝠俠、超人、閃電俠等角色卡牌可以儲，仲有埋每個角色嘅招式同技能卡牌，儲得卡牌愈多，戰鬥力就愈強。此作玩法唔止用卡牌組合出招式組合，亦要自己郁埋手喺畫面上跟指示篤芒連擊，累積足夠能量之後，更能出埋家用版嘅特殊攻擊同終結技！手機版支援跨平台功能，解鎖後功能亦能同步到家用版之上。家用版賣幾百，手機版免費推出會唔會蝕本？其實手機版有超多組合包、能量點數同特別卡牌畀大家買，狂迷所使嘅錢分分鐘多過玩家用版！

平台：iOS、Android

費用：免費

《Star Wars Pinball》星戰波子機

當星戰遇上波子機會係點？咪就係上架無耐嘅波子機遊戲《Star Wars Pinball》咁囉。本作得到LucasArts授權，掛得上「Star Wars」大名，都預咗遊戲會有好多方法賺錢。波子機遊戲本身就只得「Star Wars Episode V：The Empire Strikes Back」一張枱，想玩新枱就要另外買，暫時就推出咗「Star Wars：The Clone Wars」同「Boba Fett」兩張枱，每張盛惠$15，而且仲話會陸續出新枱，「星戰迷」都應該唔志在「開枱」費用。

平台：iOS、Android　

費用：$15（iOS）、$15.44（Android）

《Curved─Text that Curves》加弧形文字

筆者真係好鍾意用手機影相兼用手機Apps執Effect，見到呢個可以喺相片上加入弧形文字，梗係第一時間Download玩。此App本身除咗有好多預設弧形Template畀大家加入文字之外，仲可以發揮創意畫上自家嘅弧形設計，推廣期間仲要免費下載，確實非常抵玩！此外仲有個ToyCamera Effects的In-App Purchase可買，不過$15似乎太貴，好多免費Apps都做得到啦！

平台：iOS　

費用：免費

《InstaFood》餐廳打卡

由於《Instagram》大熱，大把開發公司食住條水，推出好多掛住「Insta」字頭嘅影相Apps，好似加上天氣資料嘅《InstaWeather》，同埋加上地點資訊嘅《InstaPlace》，而最新出品就有《InstaFood》。香港人食飯時好多時都係手機食先，《InstaFood》既可以做到餐廳打卡兼簡單Caption如「Yummy」嘅顯示效果，仲有好多格式畀大家揀。

平台：iOS　

費用：$8

《The Sushi Spinnery》全國第一壽司店

出模擬遊戲而聞名嘅Kairosoft，近期都偏心只出Android平台版本，好幾隻遊戲如《Pocket Stables》、《Kairobotica》、《World Cruise Story》等，全部都冇iOS版。今次呢款開迴轉壽司店嘅《The Sushi Spinnery》就終於出iOS喇，背後原因真係無謂深究，總之好玩就得。

有玩開Kairosoft出品的話，都應該會覺得《The Sushi Spinnery》熟口熟面，由利用各種食材製作味道、口感、香氣及色澤都高分嘅壽司，到擺設沙律吧、迴轉壽司吧枱、擺設等配套都似曾相識；遊戲內不少食材以及菜式都要靠達成一定條件先能夠開啟，至於遊戲目標乃係要成為全國第一壽司店，但第一次玩要爆機係有啲難度；到第二次或之後玩時，因為先前已開啟咗特別菜式，所以易於達成全國第一嘅目標。

《Sleep If U Can》超煩鬧鐘

平常都會喺手機上校定兩個鬧鐘，好多時都係連環撳熄佢再瞓。有冇啲更有用嘅鬧鐘App？可能呢個《Sleep If U Can》會啱大家，佢勁在係點捽手機畫面都唔會整得停個鬧鐘，一定要你走到預設好嘅地方用手機影張相先會整得停，將場景設定喺馬桶、大門、廚房都得，搞到咁鬼麻煩，唔醒都唔得啦！

平台：iOS、Android　

費用：$15（iOS）、$13.89（Android）