《Dragon's Dogma：Dark Arisen》挑戰黑咒島

去年Capcom破格出咗隻玩美式中世紀動作角色扮演遊戲《Dragon's Dogma》，市場反應都算受落，所以廠方急不及待推出加強版《Dragon's Dogma：Dark Arisen》，實情係將原有遊戲作出適量修改，再加入新技能、新道具、新怪物以及新地圖「黑咒島」，以全新姿態推出！對於本身玩開原版嘅玩家會唔會好蝕？新版其實用得着舊Save檔，兼且仲送三種特典道具，條氣都順啲。

改版追加新內容

正如引言所講，《Dragon's Dogma：Dark Arisen》其實係既擁有原來《Dragon's Dogma》整個故事，又追加咗新內容，不過卻係以新遊戲方式推出。原有玩家並唔可以用DLC形式升級成新版本，想玩新內容，就要買新遊戲。先回顧一下《Dragon's Dogma》原有故事，遊戲講玩家扮演被惡龍奪去心臟嘅「覺者」，同一班特殊戰鬥種族「Pawn」喺開放式世界冒險；而冒險過程入面所遇到嘅巨怪造型都相當獨特兼有神話Feel，好似有由獅子、山羊同大蟒蛇合體嘅Boss「奇美拉」就極具霸氣！

舊SAVE檔獲三種特典道具

有舊版Save檔的玩家，玩《Dragon's Dogma：Dark Arisen》時會得到三種特典道具，算係廠方回饋Fans嘅心意。其一就係包含咗六套特別裝束嘅葛蘭西斯精選套裝，要知道呢款遊戲係可以任你轉換新造型斬怪；其次就係有十萬遊戲貨幣「利姆」畀玩家買道具；最後就係可將道具「剎那飛石」提升為可無限次使用嘅「剎那永久石」。如果想喺新遊戲自創角色，今集亦追加更多髮型、鬍子以及其他細微部分配件，可以創造出具個人化嘅角色。廠方亦可能收到唔少玩家抱怨原版太難玩，所以今集就調整遊戲難易度，玩起上嚟易好多。

佩戴戒指發動EX技能

今集遊戲最大改動係加入「黑咒島」呢個以黑暗地下迷宮為主嘅新場景，當然亦會有新怪物跟「覺者」作對，例如死神、獨眼巨人同新款哥布林等廿幾種新怪物，原有玩家玩落都應有新鮮感，而且仲可以用埋上集「覺者」同傭兵嘅等級能力。今集武器系統改得更強，只要佩戴能夠發動新「EX技能」嘅戒指，就可以將上集只能發動到LV2嘅技能提升為「EX技能」，舉例如果揀選戰士職業嘅玩家，就可以發動「一閃突擊EX」，能喺較遠距離及更高速下，迅速衝前刺殺敵人；又例如巫師發動「流星雨EX」時，所落下嘅隕石數目會有所增加，能大範圍攻擊敵人。

INFO

類型：動作角色扮演

開發：Capcom

平台：PS3、Xbox 360

推出日期：4月25日

售價：$228

查詢：2366 1001