山路之鞋

有啲人跑10公里未及一半就變咗行，之後就四周圍同人講話自己跑過「馬拉松」。查實「真．馬拉松」係10公里乘四再加多2.195公里。小編雖不快，但襟捱，總算唔使五粒鐘完成10×4+2.195公里；而未來目標係想將時間推前半小時外，亦想一試越野山路賽，皆因跑山比跑公路辛苦得多，充滿挑戰性。三軍未動，跑鞋先行；好多人都讚「鎖羅門」嘅跑山鞋一流，但我偏偏唔多Like佢個樣，反而睇中呢對「新平衡」Leadville 1210，據說係為美國Leadville嘅100公里山路賽特地推出嘅款式，鞋底用Vibram料，唔打得都睇得，原價九百幾，減到六百幾，售價合理。關於跑步，我說的其實是：Pray for Boston。

Tony Editor

重口味泰番梘

泰國靚番梘又點止响番梘上雕花吖，上次去清邁就喺當地品牌Herb Basics執咗唔少好嘢！清邁本身係一個Laid Back城市，去到都係Hea吓做吓Spa咁，對於沐浴用品自然有研究。Herb Basics係位於舊城區近中心位置，有冷氣之餘，室內更香氣撲鼻，行過點都要入去幫襯！花形番梘及綿羊仔番梘造型都靚，但未夠特別，反而有款叫Stone Soap石頭形番梘就真係幾啱心水，造型似足鵝卵石，末端仲加上掛繩，方便掛喺浴室，而且價錢都只不過100銖左右，送禮自用都啱數！最厲害係呢款番梘味道獨特，木炭味同肉桂味就比較正常啲，黑芝麻味仲勉強可接受，買唔落手嘅係粟米味，因為真係接受唔到成罐粟米湯淋落身嘅感覺囉！

Boris Reporter

笑中帶淚的破處記

有些男生常拿「破處」來開玩笑，但小記剛買的新碟《聖手回春》可算笑中有淚，故事改編自Mark O'Brien的自傳作品《On Seeing a Sex Surrogate》，描寫主角米克因患上小兒麻痹導致身體頭部以下癱瘓，他對性事充滿憧憬，為圓破處夢，惟有求助性治療師雪莉，歷盡各種甜酸苦辣的笑聲與淚水後，終於衝破生理與心靈障礙，一償宿願。此片主角與牧師朋友談論性愛的情節相當幽默風趣，令電影調子不會過於沉重。戲是好睇，唯獨「聖手回春」這個戲名實在太似一些深水埗妙手神醫的金漆招牌，小記相當懷疑有沒有人敢到影碟舖大聲對店員說：「唔該我要《聖手回春》！」

Angus Reporter

懷舊電極號

雖然筆者童年深受《魔神英雄傳》、《機甲武士劍》等Q版機械人卡通所荼毒，但長大後反為更留意出世前70年代卡通片角色，對它們的「老餅」設定深深着迷。話說去年尾CM's Brave合金曾推出過1976年《無敵飛天俠》的主角「電極號」合金玩具，可惜較為冷門，以致市面上貨量不多，令筆者錯過了購買機會。前陣子路過荃灣熊貓酒店某大型玩具連鎖店時，發現它竟靜悄悄返貨，售千元開外，相當抵買，因此二話不說即時付錢購入，當晚放工後更把玩了一會，好開心呢！

Alfred Reporter

戰神大叔叫人失望

小記唔多打機，除非遇到心中兩隻「戇鍋」大作，一是《Gears of War》，另一是《God of War》。前陣子後者推出前傳《God of War Ascension》，滿心歡喜買回家打算日煲夜煲，殊不知卻叫人大失所望。不但玩法缺乏新意，武器數量又極少，連一些單挑巨型Boss的大場面也不及以前震撼，再加上頭三集故事說得太圓滿，現在這前傳就有點兒畫蛇添足之感。或者部分玩家會說團體戰才是今集的最大特色，但查實耐玩度不高，而且對單打的人來說根本毫無意義，難怪連美國IGN對它的評分也不如前作啦！

Gilbert Reporter