BMW 328iA M Sport Edition跑味攻心

人靠衣裝、車要包裝，想部車望落更有跑味，自然要加番套車身包圍、換過四條靚軨先掂。最近寶馬（BMW）引入咗328iA M Sport Edition，喺原有嘅328iA身上，加裝運動化擾流套件及車內裝飾，仲改埋硬朗嘅M Sport懸掛，加上車身降低咗10mm，除咗外觀有M3影子，彎路極限及穩定性都得到提升，絕對睇得又跑得。

呢套M Sport Package係專為新3系設計，改裝部分包括車身包圍、輪圈、排氣尾管及內飾等，對於用唔着M3咁大Power，又想部車夠型、夠跑格嘅車迷嚟講，呢款328iA M Sport Edition正係心水之選，望見車頭嘅大面積進氣口及18" M系輕量化合金輪圈，就算部車停定，賣相也充滿侵略性。今代3系嘅車身尺碼放大咗唔少，長、闊、高分別去到4,624×1,811×1,429mm，唔只外觀更有霸氣，而車廂空間亦有所增長，軸距增加至2,810mm，令後排乘客嘅腿部空間都拉長咗15mm，六呎高嘅人士坐後排都唔會頂腳。由於今代3系大量運用輕量化套件，即使車身變大咗，車重反而輕咗，配合八前速波箱及Auto Start/Stop等系統，綜合耗油量可低至6.3L/100km，二氧化碳排放量亦只有147g/km。

低扭分外有勁

近年品牌多個車系都廣泛應用TwinPower Turbo技術，今代328iA都唔例外，容積只有1,997c.c.，但馬力谷到245hp，35.7kgm扭力仲早喺1,250rpm已經全數到位，仲可一直維持到4,800rpm，同以往嘅六汽缸自然吸氣引擎相比，峰值扭力更早爆發，就算處於超低轉速，只要踩深油門就有理想嘅加速勁道，毋須下下拖波谷高轉數先有反應，可以話段段都咁好爆，廠方公布0-100km/h就只需6.1秒。筆者用D檔喺公路行車，波箱三扒兩撥已經升上八檔，以80km/h車速巡航，轉數可低於1,500rpm，對減少耗油量有莫大幫助。駛至多彎山路，由於畀油與落Brake嘅交替次數密咗好多，即使以相若車速行駛，波箱都唔會貿然升上八檔，反而識得保持喺三至五檔之間，落斜加大制動力度仲會自動拖波，非常人性化，駕駛者亦可透過軚環後方嘅撥片，直接控制波檔升降，令操控更加自主。

多元化行車模式

328iA M Sport Edition 亦配備咗 Driving Experience Control，喺Sport模式之下，波箱會保持較低檔位、油門反應更為敏銳，起油速度亦更加爽快，只係用D檔輕鬆跑吓山路已經非常好玩。相反，如果想慳油減排，只要切換至ECO PRO，引擎輸出就會稍為降低，而且會提早升檔，就算將油門踩到底，引擎都唔會全力加速，最多可以慳到高達20%耗油量。車廂方面，多個部分都換咗M Sport Package配件，例如多功能真皮軚環、前排運動型座椅、腳踏以至金屬門檻都係M系出品，加上測試車採用紅色皮椅，內外都散發濃烈嘅運動氣息。目前代理已將藍芽系統、iDrive連6.5"屏幕、天窗及Bi-Xenon頭燈列為標準配備，車價由$558,000起。

X系列 擴充在望

寶馬早於2008年推出首部SAC X6，相隔五年，外觀與產品定位都與X6相近嘅中型SAC X4 Concept（圖示），好有可能喺下個禮拜嘅上海車展亮相，目前已知車身長、闊、高分別為4,648×1,915×1,622mm，尺碼比X6細，動力系統就尚待公布，若然落實量產嘅話，即係話寶馬X家族就會有X1、X3、X4、X5及X6等五個型號。

反傳統 柴油車攻美

一直以來，柴油私家車喺美國都未及歐洲咁受歡迎，但係喺啱啱過去嘅紐約車展上，北美BMW行政總裁Ludwig Willisch表示，未來五年，品牌會將所有柴油車款引入美國市場，佢接受外國媒體訪問時指出，柴油引擎擁有更長嘅續航力，而且扭力更強，又有更慳家嘅耗油量，都係傳統汽油引擎難以匹敵。

SPEC

車 型： 四門五座位房車

引 擎： 直四TwinPower Turbo

容 積： 1,997c.c.

最大馬力： 245hp/5,000-6,500rpm

最大扭力： 35.7kgm/1,250-4,800rpm

驅 動： 前置引擎、後輪驅動

傳 動： 八前速Steptronic自動波

車身體積： 4,624×1,811×1,429mm（長×闊×高）

車 價： $558,000起

查 詢： 3129 9000（BMW HK）