《Ninja Gaiden 3：Razor's Edge》新女上場斬得過癮

雖然Wii U已推出四、五個月，不過聲勢唔算特別勁，看來任天堂要想想辦法。另一邊廂遊戲開發廠商就自動識走位，Tecmo Koei將原本喺Wii U首發嘅作品《Ninja Gaiden 3：Razor's Edge》移植到PS3同Xbox 360，始終人哋賣得機多，遊戲出貨量自然有保證！講番呢隻《Ninja Gaiden 3》嘅加強版，除咗第三集龍隼、紅葉同綾音之外，再追加另一女角霞，大玩一王三后；加上新設計嘅武器成長系統，連同回歸嘅「斷肢」系統，斬得特別過癮！

360版對應SmartGlass

Wii U版定係PS3、Xbox 360版嘅畫面靚啲？其實相差無幾，不過開發公司都算有誠意，Xbox 360版本可對應SmartGlass功能，喺手機或平板上面睇得見自己嘅遊戲成績同戰鬥技巧，亦可以喺「秘傳」項目入面瀏覽其他玩家嘅過關心得，唔止淨係齋劈！《Ninja Gaiden 3：Razor's Edge》話晒係加強版，角色同武器方面當然增多，例如加入《DOA》人氣索女霞，至於另一人氣女角綾音在今集就更有佢嘅專屬故事模式，招式方面又可使出型到震嘅「裂風迅風殺」以及高速移動擊殺的奧義「櫻惑」，吸引力點都大過斬人斬咗好多年嘅男角龍隼。

更多忍法跟奧義殺敵

至於忍法同技能都有執過，就以唯一男角龍隼為例，今集會使出笨重但攻擊力強大兼能發出衝擊波嘅「迅嵐丸及邪神劍」，而當武器「無想新月棍」等級升到最高時，仲會喺棍兩端加入鏈球以增加攻擊力同增加Combo數字，都幾可怕。新奧義方面則有能迴避所有攻擊嘅「空蟬」，以及可以一口氣從人堆中突圍斬殺多名敵人嘅「破魔裂風刃」。另外今集終於可以再次見到敵人斷肢爆血嘅超暴力場面，嫌《Ninja Gaiden 3》未夠血腥嘅玩家今次應可放心。畀咗咁多新招玩家用，開發小組都自然有調節過敵人嘅A.I.，今集嘅敵人變得聰明咗同難纏咗，往往要靠絕招先搞得掂。

導入武器忍法成長系統

早一、兩年遊戲好興加入QTE場景，即係畫面上顯示出按鈕指示，要玩家於極短時限內按啱指令先可過關。《Ninja Gaiden 3》都加入咗好多QTE場景，不過呢種玩法唔係個個玩家都受落，所以今集大幅減少QTE場景，令玩家可以專心一意諗用咩招式擊敗敵人。另一方面，要玩家們協力進行嘅「Ninja Trials」關數亦大幅提升至100關，而且難度仲增加咗好多，如果有能力可以打得晒全部100關就真係稱得上高手中嘅高手；另外多人戰方面亦有收錄咗五個場景嘅「Clan Battle」；並會導入忍法跟武器成長系統，先決條件係要靠「Karma」值來升級武器同忍法，而奧義以及新服飾一經強化後更可以喺下個章節繼續使用。

INFO

類　　型：動作

開　　發：Team Ninja

平　　台：PS3、Xbox 360

推出日期：已推出

售　　價：約$450

查　　詢：2359 7998