on.cc 東方互動主頁

LG Optimus F5 LTE 4G湊熱鬧

之前政府拎咗新一段4G頻譜出嚟拍賣，各大網絡商都爭相出價。想湊熱鬧用4G網絡的話，LG就有部支援香港4G制式嘅中階機Optimus F5 LTE畀你揀，睇串流、下載Apps都超爽手，而且仲內置唔少旗艦機Optimus G嘅招牌功能，例如玩多工作業嘅《QSlide》、一拍翻譯嘅《QuickTranslator》等等，功能超齊，仲唔趁早入手？

香港制式合用

香港4G制式都發展咗一年有多，由當初淨係戶外用到，到依家搭港鐵都收到，覆蓋的確愈來愈廣。而LG新作Optimus F5 LTE就支援800、1,800、2,600MHz三個頻譜，香港嘅4G網絡商都用得到。小記喺銅鑼灣室內做測試，透過《OFCA》App，下載速度平均超過15Mbps，表現同一眾4G手機相近，合格！而4G制式嘅耗電量一向較高，故此新機亦將電池容量相應提升至2,150mAh，再加上內置省電模式，慳住使應該都玩到超過八至十個鐘。

4.3吋靚芒

用得4G網絡商，少不免用來煲吓串流影片。此機就有個4.3吋屏幕，等大家睇得舒服啲，屏幕解像度不但有960×540，更換上出名質高嘅IPS素材，色彩顯示好豐富，用來睇相同電影嘅效果都相當唔錯；另外屏幕可視角度亦好高，側側哋睇都唔會偏色或反白，睇得舒服。

講完睇片，就梗係要講埋影相。雖然新機嘅鏡頭只得500萬像素，不過就有特別拍攝功能補數，好似Time Catch Shot同Cheese Shutter，前者會喺撳快門前預先幫你影定幾幅相，確保唔會Miss咗重要一刻；而後者只要用口講「Cheese」就會自動幫你撳快門影相，篤芒搞到手震嘅機會都少啲。

自家實用軟件

機能方面，此機搭載1.2GHz雙核心處理器，加上有1GB RAM，運行Android 4.1作業系統基本上唔會Lag機；又可以插32GB microSD卡擴充，再多啲高清片同音樂都裝得落。值得一提，系統介面以及功能上都落足心思，好似《QuickTranslator》，只要用鏡頭對住文字或句子就可以即時翻譯；而《QuickMemo》就可以喺手機任何畫面上隨意畫嘢同埋記事，仲可以更換筆觸以及顏色。而小記最Buy就係佢竟然有埋旗艦機Optimus G嘅《QSlide》功能，計算機、瀏覽器、影片播放器等特定Apps可以隨時縮細成視窗仔，仲可以調校視窗嘅透明度，等大家玩盡多工作業。