十蚊雞PSG頸巾

我有個壞習慣，就係每到一個城市，都會買條當地足球隊嘅頸巾，不過其實本人好少戴頸巾！早前去巴黎，行行吓香榭麗舍大道畀大大個碧咸肖像吸引住，好自然就唔覺意入咗去PSG專賣店進貢！PSG球衣就唔使諗，香港仲要平啲，都係揀條頸巾好過。店內頸巾款式都幾多，有啲仲係斯文款式，返工襯西裝都得，不過最後我都係揀咗條寫住「Ici c'est Paris」嘅款式，話晒係法蘭西文，好似矜貴啲咁囉！埋單計數都只係10歐元，平過買條J-League貨色。雖然截稿前唔知歐聯PSG對巴塞係咩比數，但希望次回合PSG繼續踢場好波！

Brian Reporter

誌上限定沙賓基

筆者近幾年先開始儲超合金，事緣有次在皆旺商場閒逛，遇到童年至愛卡通《戰鬥機械沙賓基》的「超合金魂」玩具，全新未開都只不過賣四舊水，平成咁就把心一橫即刻買，亦從此踏上儲合金之路。Bandai合金魂沙賓基其實有兩款，當中連同雜誌一齊買的「誌上限定」版就多三隻細小的Walker Machine，這款玩具是我夢寐以求的，可惜多年來總是緣慳一面。幸好最近畀我在拍賣網遇到，仲要不用一千有交易，因此便快快Bid落返屋企，兼影埋相留念，靚仔乎？

Alfred Reporter

又嚟開戰日

由《Gears of War 2》開始，小記就愛上佢獨特嘅「五十波戰爭」，更不時三五知己在網上聯誼「五十波」一番。不過玩得耐就熱情不再，好在有新作《Gears of War：Judgment》重新點燃人生樂趣！由於前作嘅主角故事已經圓滿結束，所以今集就由K Team嘅機械工巴德擔正，加上有大量新槍玩，小記覺得真係正到爆！暫時小記打緊故事模式，不過最頂唔順係佢今次有VIP Pass制度，可以用千六MS Point買升級，快得嚟又有新地圖玩，咁咪即係變相加價囉！

Michael Reporter

網購輕便Tote Bag

小記向來對Tote Bag情有獨鍾，貪佢上膊方便，拎嘢又夠就手，最可惜係香港賣街嘅款式唔多。前排見外國網站搞特價兼免運費，呢款Penfield Tote Bag竟然賣大包唔使$150，款式唔錯，藍白配色又夠大路，勁易配襯！可惜真係「一分錢一分貨」，袋身唔挺兼冇乜細節，但勝在夠輕身，拎嚟行街袋小物都唔錯！

Vincent Reporter

神推鬼擁木結他

今日跟大家講鬼故：有些舖頭經常在門外燒衣，據說是想借鬼神之力招客，讓人神推鬼擁擺低銀両。話說，小編要在某場合高歌助興，不過家中支Taylor 214木結他無Pick-up，要駁Amp的話，就要買個外置的攝在Sound Hole上；查實我有外置Pick-up的，不過幾年前搬屋後便音訊杳然。與其搵舊，不如買新，於是去了某大琴行，Single Coil和Humbukcer的款式都有，統統盛惠六百大元，揀呀揀，結果，我無端端買了支原價萬幾元的Maton EM225木結他。因為本人少時遭Grunge荼毒甚深，遂令Taylor滿目瘡痍，難登大雅之堂，加上琴行大減價，足足平了四千幾銀，仲可以免息分期，引得我即場扑錘，丁點肉痛也沒有！

後記：

新結他有內置Pick-up的，我不理智，並非失智。至於上述結他詞彙，明者明也，不明者解釋三日仍莫名其妙，勿強求。另外，驅使人花錢的魔鬼，其實長駐小弟靈魂深處。

Tony Editor