排隊買金HT 1/6 Iron Patriot

早排旺角西洋菜南街嘅行人專用區大排長龍，唔係排隊買奶粉，亦唔係撲演唱會飛，而係買「金」，不過此金並非999千足純金，而係Hot Toys首度發表嘅1/6合金愛國者Iron Patriot，全身有超過四成用Die-cast合金製成，配合新設計嘅活動關節，身為鐵人迷，之前又未得閒排埋一份嘅話，依家準備好銀包被放血未？

《Iron Man》Keep住高人氣至今，香港HT實在功不可沒，由MK Ⅰ出到MK Ⅶ，再由半胸像出到半可動嘅Power Pose Series，大大話話出過20款有多，難得係出極都有人買，問你服未？最難得係廠商每次都加入新Gimmick，令玩家欲罷不能，HT就對今次嘅Iron Patriot咁睇︰「其實一直有粉絲疑惑我哋嘅出品未夠分量，所以當落實開發《Iron Man 3》嘅時候，我哋已經構思將合金元素加入去，經過多番嘗試，終於喺靈活性及合金比例上取得平衡後，就炮製出今次全新嘅MMS Diecast Series。」

再見粉紅三角位

要變成真「Iron」，部件亦要作出取捨，因為合金唔能夠加入太多複雜細節，一啲複雜、多花紋嘅位置，包括頭盔等就沿用膠件製作，至於線條較簡單嘅部分，例如手瓜、小腿等，就改用合金製成，金屬部分大約佔整個Figure嘅40%，重量接近1.5kg，堪稱近年最重秤嘅1/6 Action Figure。另一方面，以往經常甩色嘅三角褲位，用料由PVC改為ABS，唔再怕擺得耐變成粉紅底橫。

新關節更逼真

重量增加咗，怕唔怕關節唔受力？HT就將部分關節嘅鉸位改為「極力子」鉸，喺內部齒輪帶動下，保持靈活性之餘又夠力Hold住甫士，好橋！其他關節亦見心思，例如胸腹由三件Parts組成，做到摺腹動作，手肘就改用三重關節，屈曲幅度超過90°，令動作更加Human-being。頭雕方面，初辦已獲演員Don Cheadle審批Pass，不過美術總監JC.Hong仲嫌未夠完美，要再作改良，所以真人面目要遲啲先可以公諸於世，鐵人迷要畀多些少耐性喇。

同步上架

除了1/6 Figure，HT都有為前兩集電影製成1/4胸像，《Iron Man 3》又點會例外，率先現身就有MK Ⅶ及Iron Patriot，高約23cm，塗裝、比例以至雕工都交足貨之餘，雙眼及心口都有LED發光功能，加埋1/4嘅尺寸，夠晒台型。

查詢︰2388 4677（Toy Hunters）s