復仇者三缺一

玩開Action Figure嘅人都有鋪癮,就係乜都要儲齊一套先得,但咁樣絕對係財力嘅挑戰,因為《Predator》、《Star Wars》等作品等閒都有十幾二十隻,想儲齊冇幾十張金牛都咪使旨意。小記財困,所以只能貴精不貴多,《Dark Knight》淨係儲咗蝙蝠俠同小丑,《幪面超人》又只能儲The Black同影月。最近又睇中新Series─《Avengers》,經過一年時間,Iron Man、Thor及Captain America終於全部入手,依家只差Hulk就儲齊四個核心復仇者。不過話明係綠巨人,到時點入櫃又係另一大問題!

Gilbert Reporter

免駁聽歌

早排去旅行,好不幸小記住嘅酒店娛樂配套係零,夜晚喺房冇音樂聽始終有啲悶!好彩有帶呢隻喇叭,佢係用筆芯電又夠細隻,可隨身攜帶,只要將部手機擺喺喇叭頂就可以無線過歌播放,真係方便,免駁線就有得聽歌,你都咪話唔爽!

Michael Reporter

波神入手

要數近代NBA最有代表性嘅人物,80後嘅小記一定揀Michael Jordan!要向「波神」致敬,好多人都會買佢嘅波衫,又或者近年成日復刻嘅AJ波鞋,計我話要帶埋佢返屋企至啱數!其實小記最近買咗Enterbay 1/6 Jordan Figure,雖然係膠製玩具一個,不過頭雕、比例、膚色,以至件45號波衫、熱身Tracksuit、Spalding籃球同埋隻AJ10波鞋都超逼真,擺出嚟簡直好似波神喺你面前咁!最罕有係全球限量2,000隻,難怪網上已經由原價$2,188炒貴一倍,不過我呢個佐敦迷係唔會放!

Vincent Reporter

阿叔仲有氣有力

如果你是八、九十年代荷里活動作片的擁躉,對布斯韋利士都應該不感陌生,不單《虎膽龍威》系列長拍長有,《絕世天劫》、《第五元素》等亦是經典佳作,但計落其實此君年紀唔細(1955年出世),稱得上阿叔有餘,但仍然有氣有力,之前有齣《虎膽龍威:擇日開戰》,還有就快上映的《義勇群英:毒蛇反擊戰》;想煲碟亦有小記剛買的這隻《白日暗戰》可選擇,布先生與同是老戲骨的異形女星薛歌妮韋花有多場對手戲,劇情是一貫的特務追殺、案中有案,動作片迷應該滿意收貨,兩位年過半百的主角有演技上的交流,幸好沒有床上戲,否則驚嚇程度可媲美恐怖片。

Angus Reporter

百花齊放

筆者喜歡高達,又鍾意儲超合金,Bandai產品自然一屋都係。不過玩具業界仲有其他精英分子,玩具質素一樣有睇頭,百花齊放。作為Hobby版記者的我,睇啱心水當然會掏腰包支持!最近港產Action Toys推出ES合金《功夫貓黨》主角太郎,換樣造型夠抵死;同廠的EX合金小雲更化身「貓耳」版,配埋變身槍同小吉齊齊Chok樣。那邊廂日本壽屋將《四葉妹妹》主角小岩井變成模型推出,創意爆晒燈。三月咁多正玩具推出,筆者咁就花咗1,400蚊捧場喇!

Alfred Reporter

復仇者三缺一

免駁聽歌

波神入手

阿叔仲有氣有力

百花齊放