美國波士頓直擊 PAX East展率先試玩手掣版《Diablo III》

上月紐約PS4發布會上，Blizzard表示《Diablo III》將會移植到PS3及PS4；而剛於波士頓舉行嘅PAX East遊戲展就全球首度公開PS版《Diablo III》，當然今次只係PS3版，PS4仲未知幾時有！遊戲畫面表現靚唔在講，操控亦幾容易，似足Action Game咁爽快！Blizzard事先張揚會同場公布一個「小遊戲」，原來就係以《Warcraft》角色為藍本嘅一對一新卡片遊戲《Hearthstone：Heroes of Warcraft》（爐石戰記：魔獸英雄傳），上手易、策略性高，更可用iPad玩添！

《Diablo III》PS3版作多項調整

唔少PC玩家可能已經打爆《Diablo III》PC版好幾次，不過正如《Diablo III》Console版遊戲製作人所講，有啲Console玩家係唔玩PC Game，所以唔擔心兩個版本有正面衝突。雖然兩版本遊戲內容大致相同，不過原來Console版係由另一班開發團隊打造，並特別針對呢類玩家嘅要求，改動咗操作同介面，甚至連角色動作、遊戲系統以至場景設計都有所調整。一入到PAX East會場，排隊試玩人士為數不少，好在有段媒體專玩時間，終於可一試同PC版有幾大分別。

操作爽快似動作遊戲

試玩版場景係第三版Arreat Gate，冇得揀角色，只有Barbarian野蠻人同Demon Hunter狩魔獵人可用；Barbarian力大擅近戰，而Demon Hunter則擅遠距離攻擊。操作最大分別係PS3版以四個功能鍵加R1及R2鍵使出六種不同技能，可以喺畫面左下方睇清楚每個功能鍵所代表嘅技能；而左Analog控制移動方向，右Analog係向前滾動。PC版要靠點擊滑鼠攻擊同移動，但PS3版玩法就好似ARPG遊戲，可以好暢順及靈活地移動角色攻擊，以及從一群怪物包圍下突圍，玩得非常爽快。至於道具管理系統都經改良，用上環形介面，方便以手掣揀選道具或裝備各組武器。試玩版限時約15分鐘左右，不過已經試到跟NPC交談、移動、殺敵及更換裝備，如果時間再長啲就可以試得更真！

最多四人組隊出戰

至於連線系統都有分別，PC版一定要接上Battle.net去玩，PS3版就改為連接PSN，就算跟朋友組隊時都係要靠PSN配對，但PS3版只能組成一支最多四人隊伍。現場PS3版本試玩版已跑得非常暢順（60FPS/720p），畫面亦做得好靚，咁PS4版本又會點？有冇可能喺其他家用平台推出呢？開發小組成員對一切都「No Comment」，不過之前已有傳話會於新Xbox上推出，連筆者所收到嘅官方相片中，亦有幾個檔案名稱係以「Xbox」字頭命名，睇怕呢個傳聞都唔多似係流料！

INFO

平台：PS3、PS4

推出日期：待定

《Hearthstone：Heroes of Warcraft》魔獸風格卡片遊戲

《Diablo III》開發經年，Blizzard喺PAX East上發布嘅新作《Hearthstone：Heroes of Warcraft》就爽手好多，一支15人團隊大概用上一年時間就搞掂，當然遊戲規模同架構方面簡單好多。呢套之前稱為「小遊戲」嘅新作係玩一對一卡片對戰，大家都大概知道點玩。當然，掛得上《Warcraft》牌頭總有啲特別，遊戲開始時要從九個《Warcraft》經典職業入面揀選要代表嘅英雄，每個角色都各有專長，如可為己方補血或攻擊對方英雄；而遊戲入面所出現嘅300張卡片都用上《Warcraft》法術、武器同角色設計，Fans一睇都知道每張卡片屬性，未玩過《Warcraft》的話，都可依從卡片上使用時所需要嘅點數、攻擊力、體力加上特殊能力提示入手。

15分鐘砌低對方英雄

此作除咗PC版之外，連iPad版都有，更係第一套支援iPad嘅Blizzard遊戲。試玩時以Training模式一對一進行，由於最初所能使用嘅點數少之又少，只得較弱嘅卡片，每回合就再加一個行動點數及抽一張新卡。小記連玩兩鋪抽到嘅卡片都超爛，反而對手台灣記者抽中幾次攻擊力達到「7」以上嘅王牌。雖說爛牌有爛牌嘅打法，但始終苦戰兩鋪都戰敗。其實遊戲都幾好玩，皆因要用腦諗策略，每鋪大概玩10至15分鐘就完成，線上玩仲可以儲卡。遊戲最特別係可以自己整新卡，將唔鍾意用嘅卡片或重複卡片熔掉再合成新卡，咁唔使怕抽一世都抽唔中特別卡片。遊戲今年夏天就會推出公測試版本，好想玩吧！

INFO

平台：Windows、Mac、iPad

Beta測試日期：今年夏天

推出日期：待定

PAX East遊戲Card Games嘉年華

每年六月喺美國洛杉磯舉行嘅E3 Expo只為業界人事而設，反觀波士頓PAX East遊戲展就係面向所有玩家嘅活動，跟每年八月底、九月初於西雅圖舉行嘅PAX Prime齊名。雖然門票都唔平，每日入場費US$35（折合約$270），不過由於可以由朝早十點玩到凌晨（玩卡片遊戲），所以場內仍然人頭湧湧，門票一早已售罄。

PAX East除咗有Blizzard、Ubisoft、Capcom、SQUARE Enix在內等多間一線歐、美、日遊戲開發商參展之外，三大遊戲平台廠商都有參與，如今次Xbox就主打剛推出嘅《Gears of War：Judgment》，PlayStation則可讓參觀者即席試玩年中推出嘅大作《The Last of Us》，而Nintendo就有《Pikmin 3》同《The Wonderful 101》等多款Wii U新作試玩。正因為PAX East遊戲展係玩家活動，唔少參觀者都一身Cosplay入場博人影相，不過要明白中西審美眼光都幾唔同，唔好用東京遊戲展Coser嘅標準去睇就會投入啲！