on.cc 東方互動主頁

巴黎直擊《Beyond：Two Souls》率先試玩少女靈異印記

兩位荷里活影星：《Juno少女孕記》、《潛行凶間》嘅Ellen Page同《蜘蛛俠》「綠魔」Willem Dafoe最近合作，不過唔係拍戲，而係參與PS3遊戲《Beyond：Two Souls》製作，於Motion Capture Studio閉關幾星期！此遊戲極具電影感，也充滿靈異風格，並由2010年憑《Heavy Rain》上位嘅法國開發單位Quantic Dream主理，今次專誠請來全球傳媒率先試玩，遊戲預計十月推出，就等筆者搶先為大家披露一下有咩賣點！

外國遊戲咁大手筆請來影星參與Motion Capture製作，都應該史無前例。Quantic Dream有個專為Motion Capture而設嘅工作室，並用上新技術同時擷取角色面部表情同動作，加上兩位影星演技精湛，令打機猶如睇荷里活A級製作。本作講由Ellen Page飾演嘅Jodie喺8歲到23歲期間嘅「靈異」經歷，原來Jodie有位靈體朋友Aiden，佢可以穿牆過壁同隔空取物，又會保護Jodie，不過有時會失控；而Willem Dafoe飾演嘅Nathan就係研究Jodie「超能力」嘅科學家，不過睇佢個樣奸奸哋，應該有陰謀。遊戲總共有300個角色係經由Motion Capture製作，總計有23,000款動作表現，拍攝加上後期製作長達一年之久，大製作是也！

女角由8歲演到23歲

《Beyond：Two Souls》加入唔少新元素，其一係以插敍手法敍事，令場景會由23歲嘅Jodie一下子返到8歲時佢被研究時嘅模樣。遊戲製作人話想玩家自己拼湊故事，而遊戲中每個決定都影響之後嘅發展以及角色性格，不過製作人唔肯「劇透」，到底角色之間有乜關係，以及有幾多個結局都大賣關子，只係話大家玩完之後或者可以搵到「死後世界」嘅意義喎！

今次試玩會有得睇預告片同遊戲示範，見到有雪地、沙漠、城市、火海等情景，而遊戲示範一段係講長大咗嘅Jodie喺大雪中被流浪漢收留，場景中既有Jodie用上Aiden嘅超能力嚟引流浪漢救佢、進入超級市場偷取日用品幫孕婦接生，同埋喺火海中拯救流浪漢同伴；亦有Jodie想跳橋輕生但被Aiden所救，玩家會感覺得到Jodie內心嘅掙扎，同其有血有肉嘅一面。

隔空取物鬼上身

至於各國傳媒可以試玩發生恐怖襲擊嘅研究院「The Condenser DPA」場景，不過開發單位可能想保持神秘感，抽起開始時Nathan駕車送Jodie到研究院時嘅對白。當到達目的地時，Jodie只能單獨行動深入研究院實驗室，現場有多具屍體兼起火，玩家要善用Aiden嘅超動力來應付各個難題。今次廠方改用新設計嘅直覺操控系統，當有需要互動物件時，物件會顯示小白點，玩家用上右Analog Stick推唔同方向即能互動；切換至Aiden靈體模式時操作亦接近，可隨時按三角形掣切換控制，按實L1鍵再加上左右Analog Stick就能令Aiden做出各種動作，甚至可以好似「鬼上身」咁操控其他角色，只要該角色定力唔夠就上到身。

試玩版入面更可試用Aiden推開夾在電梯內嘅箱、打開通風槽、取用火場後面嘅滅火筒，不過最特別係可用上讀心術讀取屍體死前記憶。由於現場得四個試玩台，筆者等玩時順道偷師其他人點玩，因此用大約10分鐘即完成，雖然係短試，不過玩法好特別，加上故事非常吸引，認真值得期待！