心愛的「馬田博士」

可能是身形關係，小記一直對長靴「寵愛有加」，鞋櫃中10對有9對都是高筒款式，當中最得我歡心的便是Dr. Martens出品的「Rocker」，除了因為設計特別之外，在香港走在街上亦較少機會同人「撞鞋」，就算現在「靴隊成員」慢慢增加，但我平日三不五時還是會穿着它四圍去，甚至更會用作配襯Styling。還記得兩年前要去日本旅行，千辛萬苦到上野找專門店，目的就是要將它「收歸旗下」，而且當時索價只需5,000日圓，非常超值！這間專門店經常揀選不同款式的Dr. Martens作超低價發售，有興趣的朋友去東京旅行時記得留意下啦！

Alex Reporter

品牌故事學懂堅毅精神

護膚品講求功效與價錢是否成正比外，有時還會講求研製背後的故事。最近打入香港市場的美國品牌RADICAL，早前創辦人Rachel就從美國遠道而來講解品牌故事，十分有Heart！原來當初Rachel生完第二胎BB後，備受玫瑰痤瘡的困擾，於是夾埋姐姐Liz入實驗室一齊研究，後來就研發出抗氧及修護效果好好又唔會引起敏感的產品。

故事講到呢度，Rachel當然因為研發成功而令自己的玫瑰痤瘡好番，其後仲送畀身邊的朋友試用，個個讚不絕口，所以令佢哋兩姐妹決心成立品牌。其實呢種堅毅不屈的精神，套用於任何事情上，都非常合適，凡事總有希望！所以真的要好好學習學習。

Ki Ki Reporter

可愛美容寶盒

女人基本上圍埋最鍾意「八卦」，好聽啲就叫做Share，而最常Share嘅就係邊啲化妝護膚品好用又扺用。難怪嘅，問多啲知多啲，唔通樣樣都要買齊嚟試咩，亦因為咁，依家啲美容社交網站發展，直頭拍得住股票網。最近又有一個叫gooodapple嘅美容潮流社交平台面世，照例要入去八吓，發現已有唔少名模同星級Blogger喺入面分享心得，而網站用咗首創標籤（Tag）呢個新功能，用家一click就搵到產品嘅資料同評語，非常方便。不過，最令人心動，係網站為咗吸引用家，推出 Apple Box，入面有多款名牌美容產品試用裝，最重要係每月免費派發！係免費呀！想要？就要上gooodapple.com登記做會員先。同事日前已收到一個首創版Apple Box，包裝係由插畫師Billie設計，紅帽妹妹真係超級可愛，嚟緊仲有三款不同設計推出，值得儲埋一Set喎！

Amy Editor

藝術紋身漢

圖中笑容滿面、夠晒鬼馬的外國人確實係一名紋身漢，這位德籍首飾設計師Patrik Muff，全身百分之八十的皮膚都有紋身，對他而言紋身就係最個人同獨一無二的飾物。訪談途中他更脫下西裝外套，向我展示壯觀的紋身圖案，大大片紋身絲毫沒有像「龍虎鳳」予人殺氣重重的感覺，反而充滿趣味，當中不乏許多你估唔到的紋身圖案，例如迷你衣架、在下巴紋上蜜蜂，還有小腿上為鼓勵自己曾經受傷，亦要振作的骨頭圖案。Patrik堅持每個紋身都是充滿色彩的，同樣的概念亦反映在他的首飾作品上，若想了解他多一點，大家不妨留意小記的報道。

Yilam Reporter