Inspire T6300喇叭 靚聲打機

用PC打機，好多人都會識得買張強勁顯示卡，不過計我話一套好嘅喇叭都唔少得，聲畫配合先有最高嘅享受！最近Creative就推出新作Inspire T6300，呢套小型5.1音響組合，喇叭特別採用專利嘅Creative Dual Slot Enclosure設計，低音效果「嘭嘭」聲，擺喺房夾PC，打機、睇戲都啱使！

DSE雙導管

遊戲、電影嘅聲效愈來愈正，喇叭當然都要配合到至得，今次Creative嘅Inspire T6300喇叭就特別採用名為Dual Slot Enclosure（DSE）技術，喇叭正面頂部的位置設有一個凹槽，廠商稱之為雙導管設計，可以更有效傳輸沉穩、洪亮嘅聲效。實測之下，發現衞星喇叭雖然Size細細，但低音效果非常好，打射擊、賽車遊戲都夠用有餘！

操作靈活

除了DSE技術之外，T6300嘅喇叭仲有Image Focusing Plate（IFP）聚焦環設計，據講呢個環狀坡形嘅喇叭單元帶，可以令聲音嘅指向性更加準確，自然有效提升聲音聚焦！另外，其低音音箱亦可以任意調校低音效果，配合線控配件，電源開關以及音量大小都可以控制到，操作都好靈活。

同場加映：Creative Inspire T3300 慳位好聲

如果屋企空間唔多，擺唔落5.1組合的話，同廠仲有2.1版本嘅T3300。雖然喇叭由五個減少至兩個，不過都同樣採用DSE以及IFP技術，就連低音音箱都一樣，音質有保證。

另類喇叭：Philips Original Radio Mini 懷舊設計

Vintage風就興咗好耐，估唔到連喇叭都玩復古設計。這款Original Radio Mini喇叭，係參考第一代1927年Philips收音機外形來設計，經典又靚仔。功能方面，喇叭有Apple Lightning插頭，一插即用；亦另備有3.5mm插頭，PC、MP3機都一樣用得。除可播歌，仲支援收音機同鬧鐘，一物多用。

Edifier C6XD 多功能5.1

有別於一般四四方方喇叭，C6XD嘅音箱特別採用棱角設計，望落好有型。而且用上全木製作，確保聲效質素；加上採用專利的Edifier Intelligent Distortion Control（E.I.D.C.），處理器會因應不同聲效自動調節功率輸出，更易適應唔同嘅音樂來源。值得一提，機身備有FM收音機、SD卡、USB、3.5mm、光纖等插口，擴充力超強！

JBL Flip 的骰便攜

要便攜的話，JBL Flip就最啱使。佢採用圓筒形設計，可以座枱，擺位靈活；而且更內置充電池，播放時間可以高達五小時。加上支援藍芽，連接手機、平板都冇問題。規格方面，機身備有兩個38mm驅動單元，另外亦有咪高峰及通話按鍵，當埋Handsfree使用都得！

查詢：（a）2686 8011