3種行裝有你一套

下個禮拜就係復活節假期，好多人都趁呢幾日去旅行，就算大家打算求其執幾件衫出發，都要記得帶埋部相機去影相，因為家陣冇番幾張相掟上網，各方好友又點知你去過旅行呢？小記今次會介紹幾套組合畀大家「照單執藥」，無論大家係乜都唔願帶嘅懶人，抑或瘋狂影相嘅攝影癡，都值得參考。

一機搞掂 DC仔

所謂「一機」，就是指長炮天涯DC，就好似近期推出的Sony Cyber-Shot WX300和HX300，分別支援20倍及50倍光學變焦，廣闊環境抑或遠距離的主體都囊括得到。WX300細部之餘單手使用都冇問題，而HX300就以長距離取勝，能夠Zoom到1,200mm，兩機各有千秋，配合Eye-Fi Pro X2 8GB記憶卡，就可以無線傳相去電腦或智能裝置。再配搭一支扭得的Joby GorillaPod Hybrid八爪腳，即使任何刁鑽的拍攝角度或地勢都難唔倒你，加埋條Hellolulu Skylor相機手帶和Hellolulu Caci相機袋就完美，唔影相的時候可以掛手，又或者放入相機袋妥善收藏。

稍有要求 無反機

想輕得來而又想影到靚相？Mirrorless無反相機就是折衷方案，有得換鏡，大家就可以視乎旅遊的景點和攝影目的而挑選合適的鏡頭。不過去得旅行，始終不想帶晒所有鏡頭家當出發，皆因要孭足全日，好易腰痠背痛，所以一部輕巧的Olympus PEN mini E-PM2無反相機加支14~150mm「天涯鏡」就夠晒用，鏡頭的等效焦距相等於28~300mm。如果對影相有更高要求，不妨帶埋Manfrotto Compact系列三腳架套裝影夜景，其倒置中軸設計亦便於收藏，配埋個中型尺寸的Lowepro Photo Hatchback 16L AW相機袋，即使要攀山涉水都唔成問題。

靚相至上 勁單反

「影相就是求質素」，有些人寧願「孭餐死」，都帶俗稱「大機」的單反去旅行。隨着單反機身逐漸輕量化，即使全片幅的Canon EOS 6D亦僅重680g，而且6D內置Wi-Fi同GPS，方便隨時傳相和定位。至於鏡頭方面，追求質素的話，就唔建議大家用天涯鏡，反之帶16~35mm F2.8 II以及24~70mm F4 IS鏡頭較實用，前者用作影風景和建築；後者則主要拍Snap，至於唔揀24~70mm F2.8的原因係欠缺IS防震，定力自然冇咁好。一絲不苟的你甚至可以帶埋支6X純碳纖編織腳管的Gitzo Traveler腳架，相比其他金屬製作的腳架，其硬度高且輕身，適合旅行帶住周圍走，一旦遇到地勢不平的地方，亦可以使用連長炮都托得起的Joby GorillaPod Focus八爪腳，那就萬無一失。