洪卓立攝影法寶晒冷

先行申報利益，筆者並非洪卓立（阿Ken）的Fans，但向來八卦又鍾意尋根究柢的本人，對他的印象有三，一是早年與同公司的衛詩雅所主演的電影《很想和你在一起》，其二個人認為比《彌敦道》更好聽的歌是《三腳貓》，第三就是因為這些演出都有出現他手持相機的畫面，所以有理由相信，他也是一位相機狂迷！

電影、MV中把玩相機，可能是劇情需要，但見洪卓立玩得似模似樣，相信實情也是龍友一名，阿Ken表示：「最初接觸相機，係大約2008年剛入行時，拍戲見到好多人都玩相機，自己又試吓影，覺得幾靚喎，就以為自己有啲天分，後來至發現原來影靚相，一部靚相機都好重要。」很多人玩相機都是由傻瓜DC開始，再到半專業Prosumer，以及最後的單反換鏡DSLR，但阿Ken的情況有點不同，第一部已是入門單反Canon EOS 350D，佢話：「最初玩相機，都冇話介意重量，但係影得多，就覺得每日帶出街都好重，所以慢慢轉玩簡單輕巧，又有玩味嘅Lomo相機，最記得有部喺台灣入手嘅『魚眼Lomo』，返香港先知本地賣平$200，不過本人就係鍾意Lomo相機嘅特別效果，所以前後入咗五部。」

今期新寵NEX-7

世事互為因果，當初因為在台灣拍電視劇經常出外景，影得多菲林靚相，令他對菲林相機愛不釋手，但沖曬照片的不便，亦令他將一系列Lomo相機「打入冷宮」，他回憶說：「菲林相機喺Outdoor環境下影嘅相的確好靚，但始終曬相好唔方便，好多時影完嘅相都冇沖出嚟，有時又唔記得邊部相機有菲林在內，搞到影落嘅相最後都冇咗。」

講到近期新寵，阿Ken表示早前到印度拍攝旅遊特輯時，就被製作團隊「毒到」，回港後立刻買了一部Sony NEX-7，Ken笑說：「因為當時喺印度拍嘢，差唔多成隊Crew都用呢部相機拍短片、影相，玩得多又覺得唔錯，所以我都入手，而且對比單反機，實在輕得多，依家差唔多每日都帶出街。」

Dream Cam：Mamiya 645

在十多部不同類型相機當中，阿Ken說最有價值的是一部由已出國的好朋友所送贈的仿書形110迷你相機，至於終極的收藏目標，原來並非潮人最愛的Leica，而是一部日牌Mamiya 645相機，阿Ken解畫：「因為有一次去Studio拍攝，見到攝影師用一部外形好特別嘅相機拍攝，傾傾吓先知係一部日本品牌相機，售價仲要過$100,000，計過數都唔知幾時先入到手，雖然較難帶出街影相，但係極高質素嘅拍攝效果，就令我留下深刻印象。」