《My Dashboard》資訊整合

用過Mac機嘅朋友應該對Dashboard呢個功能有印象，佢可以將實用資訊擺晒喺同一頁，好方便；依家連iOS裝置都有差唔多嘅功能，講緊嘅就係《My Dashboard》。此App可以將唔同類型資訊整合，好似RSS Feed、Facebook、Instagram、日曆、天氣、相簿等等，喺App入面打橫一掃就可以轉換內容；用家亦可以選擇一版顯示一種或者兩種內容，自由度極高！而小記最鍾意就係佢個《Instagram》介面，雖然只係可以選擇My Feed或者Popular Feed，不過勝在可以用方格形式一次過顯示32幅小圖，連原生App都做唔到，啱晒鍾意睇相嘅用家！

下載費用：$8

支援平台：iOS 5.0

《iHorse Racing》賽馬育成

身邊唔少朋友都係馬迷，但係並非個個都有機會策馬奔馳，遊戲《iHorse Racing》就可以畀大家過足癮！遊戲將賽馬活動「移植」到手機，好似操練、出賽呢啲基本玩法當然有齊，用家仲可以策騎愛駒出賽；仲連馬房管理、馬匹拍賣會都有得玩，內容好豐富。加上遊戲畫面逼真，介面又全面中文化，好地道！

下載費用：免費

支援平台：Android 2.0.1

《PITFALL》重玩經典

1982年經典遊戲《PITFALL》終於可以用手機玩到，玩家同樣要控制主角Pitfall Harry喺森林入面喪跑搵寶物，唔單止要攀高、爬低仲要跳崖，沿途仲要有唔同動物好似蛇、蠍子出嚟攻擊你，身手差啲都過唔到關。用家仲可以邊玩邊攞鑽石等道具，儲夠就可以去Store幫人物換衫同埋買Checkpoints，都算襟玩。

下載費用：免費

支援平台：iOS 4.3、Android 2.3.3

《FanPiece》籃足齊料

土炮資訊網站《FanPiece》最近有App版上架，介面經優化後比網頁版簡潔同埋易睇咗，而且仲有齊網頁上嘅內容，當中梗係唔少得極多粉絲嘅「球迷世界」以及「籃球天地」，相關新聞、獨到評論以至賽事精華影片都可以用手機睇到，啱晒球迷啦！

下載費用：免費

支援平台：iOS 5.0、Android 2.2

《Icomania》標誌任估

有冇試過見到品牌Icon、電影人物，但係講唔出佢個名呢？咁就一定要玩新App《Icomania》。App內備有過百個卡通圖案，包括品牌商標、電影角色、國家、名人等等，一於考你記性同常識。唔識的話都唔緊要，因為可以畀錢買提示，亦可以連接Facebook帳戶搵朋友幫手，好互動。

下載費用：免費

支援平台：iOS 5.0、Android 2.2

《Calendars by Readdle》實用日曆

全面支援Google日曆全部功能，一Sync就用到；而唔同日曆嘅事項會喺畫面以唔同顏色、時段標示出嚟，比原生《行事曆》清晰。最特別就係日曆事項可以直接Drag去其他日子，唔使次次編輯事項咁麻煩；另外App更內置專用Keyboard，將小時、分鐘用格仔顯示，輸入新事項爽快好多。

下載費用：免費

支援平台：iOS 5.0